کولت آذ گونئی لی شاعیر و یازار "سحر خیاوی"نین حیکایه سینی تقدیم ائدیر:

آخشام چاغی پاییز گونلرینین بیریدی. هر یئری چن دومان‌ بوروموشدو. اوزاقلار بیر رؤیا کیمین گؤرسه‌نیردی. قاباغا گئتدیکجه سانکی پرده‌لر قیراغا چکیلیب تصویرلر جانلانیردی. بویلو قادین ائولرینه یاخینلاشیردی. ائولرینین بؤیرونده اولان قبریستانی گئندن گؤرنده اوشندی. اوره‌یینه غریب بیر قورخو دولدو. قبریستانین اوستون چن بوروموشدو. وهملی بیر منظره یارانمیشدی. دومانین ایچینده الکتریک آغاجلاردا چیراغلار یانیردی. سانکی الی فانوسلی روحلار اونا ساری گلیردیلر. قورخوسو یان کوچه‌دن چیخان جنازه آپاران کیشی و قادین دسته‌سیله لاپ تکمیللشدی. کیشی‌لر لااله الا الله دئیه‌رکن قارایا بورونموش بیر تابوتو اللری اوسته آپاریردیلار. قادینلار شووه‌ن چکیب اوخشاما دئییردیلر. قادینین قورخودان گؤزلری بره‌لدی. بیر شئی اوره‌یینده ایستی-ایستی تؤکولدو. او ایندییه‌جن اؤلومه بو قده‌ر فیکیرلشمه‌میشدی! اؤلومو بو حدده یاخین حیس ائتمه‌میشدی!
اونلارین اؤنوندن تئزجه سووشدو. امما بو منظره‌لری گؤرمک اونون حساس حالدا اولدوغونا پیس تأثیر بوراخدی. ناخوشلادی. او گوندن بری حیس ائدیردی اؤلوبدو و هئچ کیمسه‌یه بو حالین سؤیله‌یه بیلمیردی. سانیردی هر کسه سؤیله‌سه بو ماجرانی اونو لاغا قویوب گوله‌جک. بئینینده سانکی قبریستان اوستونه چؤکن دومان چؤکموشدو. بیر تهر یوخو-اویاقلیق حالیندا یاشاییردی او گوندن بری. بو حالدا ائوینین ایشین گؤرمگه‌ده سینیق سالخاق ناچاریدی. دؤنه‌لر احساسی اولماغی و دیری اولماغینی سیناماغا ألین گاز اوستونده اولان قاب- قازانا یاپیشدیریردی. گاه قصدیجه آیاقین آذر سویوغوندا گور یانان سوبایا یاپیشدیریردی. اؤزون یاندیریردی بلکه بیلسین اؤلمه‌ییب. گاه الین پیچاقلا کسیب یاراسینا دوز سپیردی و گؤینلتی‌سیندن لذت آلیردی. شوکور دیری‌یم. آغری آجینی بیلیرم دئییردی!! او گونو گوندن سویا گئدیردی امما حیات یولداشی سانکی بو ارییه‌ن شامی اؤنونده گؤرموردو. هردن بونلاردان داها قورخولو ایشلره ال ووروردو. بیر گون آتاسی ائویندن قاییداندا اؤزون قصدیجه ماشین قاباغینا آتدی بلکه سوروجونون اونو گؤردوگون و دیری اولماسین دویسون. توند گله‌ن ماشین شدتلی ترمز ائله‌دی. دالیجا طاس اورتا یاشلی سوروجو دوشوب قادینی یامانا باسدی. قادین دینمه‌دن مات - مات اونا باخیردی. سوروجو ساندی او لال- کاردی. باشین توولاییب آی اللاهین یازیغی منی ده یازیغ ائله‌میشدین دئییب جیبیندن یزدی دستمالین چیخاردیب اوز گؤزونون ترین سیلدی. اوندان یولا دوشوب گئتدی. قادین تصادف‌دن قورخماق و سوروجودن یامان ائشیتمه‌گه رغمن اوره‌یینده سئوینیردی. چونکو او دیریدی. اونو سوروجو گؤروب و یامانلامیشدی. بیر آخشامدا دیری اولماغین سیناغا چکمه‌گه گئجه یاریسیناجا داریخماق بهانه‌سینه بالکن‌دا قالمیشدی. او آخشام شهرین ایلک قاری یاغیردی. قادین الکتریک آغاجین چیراغینین اؤنونده اوچوشان قار دنه‌لرینه باخیردی. اونلار یانان اولدوزلار کیمین ایشیقدا اوچوشوردولار. ال آیاقی بوم- بوز اولوب، دیشی دیشینه دییردی. آز قالیردی قار آدامینا دؤنسون. الین یاغان قارین آلتینا توتوب بیر اووج قاری کؤزلو اوره‌ینین باشینا قویدو او اؤلمه‌میشدی چونکو سویوغو حیس ائدیردی. تیتره‌ک ائوه گیردی. حیات یولداشی خبرسیز نورسوز شب خواب آلتیندا پتویا بورونوب یاتمیشدی؛ بؤیرونه تپیلدی. دونموش گؤوده‌سین ارینین قوجاغینا یئرلشدیردی. کیشی بیر آن اونون سویوق بدنین لمس ائله‌مه‌دن دیسکیندی؛ مختصر آییلیب سونرا اونو سیخ باغرینا باسدی. چوخ چکدی بدنی قیزیشسین امما اوره‌یینده سئوینیردی اؤلمه‌ییب و سویوغو حیس ائدیب. بدنی یاواش یاواش قیزیشارکن یوخو گؤزلرینه گلیردی‌ یازیغ قادینین.
بیر داها گون حیات یولداشی چوخ اوزگون و داریخان حالین گؤروب ماشینا میندیریب دولانماغا آپاردی اونو. حیات یولداشی باغین بیر گوشه‌سینده ایشله‌ییردی. قادین دیلینین آلتیندا سئودیگی بیر ماهنی‌نی میزیلدانارکن‌ باغین ایچینده گزیردی. لاپدان اؤنونده اوتلاری ترپه‌شن گؤردو... اول حیس ائتدی یئل اونلاری أسدیریر امما الینده کی آغاجلا اوتلاری قیراغا ووراندا اوزون بیر ایلان گؤردو. ازل دیلی توتولدو. امما سونرا تامام قدرتیله قاچا- قاچا أرین هایلادی... اسماعیل...اسماعیل... اسماعیل..... أری سسین ائشیدن اونا ساری قاچدی. دیلی توتار توتماز ایلان- ایلان دئییب؛ ارینین قاباغیندا یئره ییخلیب؛ هوشدان گئتدی. او أرینین بئل‌له گؤرستدیگی سمته قاچدیغین و ایلانی اؤلدورمه‌یین گؤرمه‌دی. یازیغ قادین داها بویلو دئییلدی. اوشاغی سقط اولموشدو. آمما قورخموردو دای. پئسیکال ناخوشلوغی دوزه‌لمیشدی. سانکی بو ناخوشلوق توخداماغا بیر آغیر شوک و قورخو گرکلی‌ایمیش و ایلان بو ایشی گؤرموشدو!!!