آنا صحیفه ادبیات |
باغچادا گوللرین یانیندا مؤولانا ایله صحبت ائدیردیک. مؤولانانی زیارته بیر قروپ فیلوسوف گلدی. سواللاری اولدوغونو بیلدیردیلر. مؤولانا اونلارا منی گؤسترهرک.
— منیم سواللاریمی جاوابلایاندان سوروشون- دئیه منه حواله ائتدی. بوندان سونرا، گلن فیلوسوفلار اوچ سوال سوروشماق ایستدیکلرینی بیلدیردیلر.
— سواللارین نه اولدوغونو سوروشدوم. اونلار ایچلریندن بیرینی باشچی سئچدیلر. بوتون سواللاری او وئرهجکدی. سوروشماغا باشلادی:
— الله وار دئدینیز، اما گؤرونمز، گؤستر ده ایناناق.
— او بیری سوالی دا وئر -دئدیم
— شیطانین آتشدن یارادیلدیغینی سؤیلییرسینیز، سونرا دا اودلا اونا عذاب ائدیلهجک دئییرسینیز، هئچ آتش آتشه عذاب وئررمی؟ -دئدی.
— یاخشی، او بیریسینی ده سوروش-دئدیم.
— آخیرتده هر کس حاقینی آلاجاق، ائتدیکلرینین جزاسینی چکهجک دئییرسینیز. بوراخین اینسانلاری نه ایستییرلرسه ائتسینلر.- دئدی.
— بونلارمی سواللارینیز؟ ایندی منیم آرخامجا گلین سیزه جوابلاری وئریم.
قالخدیم، باغچا دیواری اوچون کرپیج دوزلدن موریدلرین یانینا گلدیک. یئردن قوروموش بیر کرپیج گؤتوردوم و سواللاری وئرهنین باشینا ووردوم. سوال سوروشماغا گلن فیلوسوفلار بونو گؤروب تئز-تلسیک کونیا قاضیسیننین یانینا گئتدیلر.
مؤولانا "ایندی نه اولاجاق" دئیر کیمی باخیردی. اونون عقلیندان کئچهنلری اوخودوم. ناراحات اولما، گؤزله گؤر، سواللارینین جاوابینی ائله آلاجاق کی، اللهین درگاهینا توبهیه دوغرو یولا گلهجکلر. ایندی محکمه ایشچیسی بیزی چاغیرانا قدر ناماز قیلاق.
یاریم ساعت کئچمیشدی کی خبر گلدی، بیزی قاضینین حضورونا گتیردیلر. فیلوسوفلار دا چاشمیش حالدا اوردا ایدیلر. کرپیجی باشینا ووردوغوم باشی ساریلی وضعیتده اولانلاری بیر دفعه ده بیزیم یانیمیزدا ایضاح ائتمهیه باشلادی:
— من، سوال وئردیم، او دا جاوابیندا باشیما کرپیج ووردو.-دئدی
— قاضی مندن بو ایشین شرحینی ایستهدی.
-ایضاح ائتمهیه باشلادیم:
— منه، اللهی گؤستر ده اینانیم- دئدی. ایندی بو فیلوسوف، باشینین آغریدیغینی دئییر، گؤسترسین ده گؤرک.
فیلوسوف چاشقین حالدا:
— آغری وار، اما گؤستره بیلمرهم- دئدی.
— الله دا واردیر، لاکین گؤرونمز.
بو دفعه منهدن، شیطانا اودلا نئجه عذاب ائدیلجیینی سوروشدو. من اونا تورپاقلا ووردوم. تورپاق اونون باشینی اینجیتدی. حالبوکی، اؤز بدهنی ده تورپاقدان یارادیلدی.
یئنه منه: «قویون، هر کسین اوریی نه ایستییر اونو ائتسین. بونا گؤره بیر حاق اولماز.»- دئدی.
منیم اورییم اونون باشینا کرپیجی وورماق ایستهدی و ووردوم. نه اوچون حاقینی آختاریر؟!
تاریخ
2020.03.29 / 21:12
|
مولف
آیتاج آراز
|