Kult.az گونئی‌لی شاعر نادیر ایلاهینین شعرینی تقدیم ائدیر:

بیر بالتا سسی وار شعریمده منیم
من اوندان کۆسسم‌ده کۆسه بیلمیرم
بو مئشه یوخولۇقو شئعیرلریمدن
بالتانیٛن آیاغیٛن کسه بیلمیرم

اوْیاغام ...بو بالتا، جانیٛما غنیم
هیٛچ نه‌یه باشیٛمیٛ قاتماغا قوْیمور
یاتسام‌دا یوخومدا اوْیانیٛر منیم
منی ایکی گیله یاتماغا قوْیمور

بیلمیرسن آی قارداش نه‌لر چکمیشم
بوردا بیر تاخت أکن، بیر تابوت دَریر
هاچاندیٛ... هاچاندیٛ، بیر شوی أکمیشم
هله‌ده شعریمده بالتا گؤیه‌ریر !

یامان اورونله‌ییب گرایلیٛ‌لاریٛم
بیر آمانا بَتدی، بیر آها بَتدی
ثوابا یاغمادیٛ یاغیٛشیٛم قاریٛم
بلکه قار_یاغیٛشدا گۆناها بتدی

ایچیمده بیر مئشه بۆتۆن دوْغرانیٛب
نه بیر یارپاق قالیٛب، نه بیر گۆل قالیٛب
بیر گۆن دئیه‌جک‌لر بیر شاعیر یانیٛب
یئرینده بیر بالتا، بیر آز کۆل قالیٛب