Kult.az گونئی‌لی شاعر یعقوب نیکزادین شعرینی تقدیم ائدیر:

گوناه ساییلماسین تانیمادیم سا
نه بو سن او سنسن، نه بو من او من
دیدیلیب، ییرتیلیب باخیشلاریمیز
نه بو سن او سنسن، نه بو من او من

یوخوموزا گیردی بیر دلی سوو قیز
قاتیمیزا کئچدی بیر آجی پاییز
قاریشدی رویامیز، ایتدی دونیامیز
نه بو سن او سنسن، نه بو من او من

منیم گولوشومه آغی اکدیلر
سنین سئوینجینه کدر تؤکدولر
ایپک سسیمیزی دارا چکدیلر
نه بو سن او سنسن، نه بو من او من

بولاق اولدوقسا بیز چیپچالانمیشیق
قیتلیق یاخاسینا هئی جالانمیشیق
دیرناقلار آلتیندا تاپ تالانمیشیق
نه بو سن او سنسن، نه بو من او من

دیل آچیب داغیلیب دیل-داماق اولدوق
کیمسه یه یاناشدیق بیز قوراق اولدوق
اؤزگه نین چولونا بیز یاماق اولدوق
نه بو سن او سنسن، نه بو من او من

ایندی ایش بئله دیر دور گئدک بیزه!
آسیلی اولمایاق پوزولموش ایزه
بیری توخونماسین بو سئوگیمیزه
نه بو سن او سنسن، نه بو من او من

آی مارال بو دره، بو داغ درین دی
بو آرزو نه منیم، نه ده سنین دی
وطن دن ایرنجی آد قالیب ایندی
نه بو سن او سنسن ، نه بو من او من