چاغداش گونئی آذربایجان ادبیاتینین اونلولرین‌دن بیری ده کویولو سعید نججاردیر. او، ادبی یارادیجیلیغین‌دا ایستر شئیرده، ایسترسه ده نسرده یئنی دوشونجه جرهیانینین چوخ گؤزل معنادا تمثیل ائده بیله‌ن یازارلاردان بیری‌دیر.

کویولو سعید نجارین اثرلری هان‌سی ژانردا یازیلماسین‌دان آسی‌لی اولمایاراق، اولدوقجا محتشم‌دیر. بونون دا باش‌لیجا درین آنلامی بؤیوک اوستادیمیز بولود قاراچورلو سهندین روحونون سانکی یئنی‌دن دیرلیب بو گونلریمیزه گلیشینی خاطیرلادیر. ائله بیل کی، گونئی آذربایجان ادبیاتینین اونلولرینین یولو بیتممیش، داها دا محتشهم زیروه‌لره دوغرو آددیملاییر. بو یولون الیرزا نابیدیل اوختای، مرزییه اوسکولو دالغا، صمد بهرنگی، حمید نیطقی آیتن، هاشیم ترلان و باشقا اونلو آیدینلاریمیزین داوامچی‌سی کیمی‌دیر کویولو سعید نجارین یارادیجی‌لیغی. شعیرلری او قدر روحسال‌دیر کی، اونلارین سئهرین‌ده زامانین اولوسال قاوراملارینا ایشیق سالیر اونلار. اونون اثرلرینین دیلی ایسه، چاغداش گونئی آذربایجان ادبی پروسسی اوچون چوخ اؤنملی‌دیر. آنا دیلین‌ده یازماقلا یاناشی، آذربایجان و آنادولو تورکجه‌لرینین اورتامین‌دا بیر بوتون اولان بو اثرلر گئرچکدن یئنی دوشونجه‌نین اولوسال انرژی‌سینین بؤیوک بیر آخارینا چئویرلیب.

Kult.az گونئی‌لی یازارین "اورمو گؤلوم"آدلی شئیرینی تقدیم ائدیر:

اورادا بیر گؤل وارمیش، بیر من بیر ده سن،
ایندی نه گؤل قالمیش، نه سن نه ده من.
گؤروش یئریمیزی آلیب دوزدان چن،
هردن بیر داملا یاش آخیر گؤزون‌دن.

دورنالار اوچاردی، بیز ده سوزردیک،
قیرمیزی قاییقلا گؤلو گزردیک،
دالغالار ایچین‌ده هردن اوزردیک،
آدیمیزی دوزلو قوما جیزاردیق.

هارادان گل‌دی، بیلمه‌م، بئله آیری‌لیق،
هارا گئت‌دی او گؤل، دئ بیز هارداییق؟!
دوزلارین ایچین‌ده سینیق بیر قاییق،
گؤل‌سوز، سن‌سیز، من‌سیز قالیب او یازیق.

سیلین‌دی گؤزل گؤلوموزون ایزی،
آرتیق، تانیمیریق بیربیریمیزی!!!