Kult.az فرح جرایدینین "تاپدیق" آدلی حکایه‌سینی تقدیم ائدیر:

بیلیم یوُردونون سوْن گۆنلری ایدی سیْناولارین باشلانماسیْنا هله زامانیْمیز وار ایدی. بوُ گۆن بیراز ائرکن چیْخمیشدیْم گۆنش دۆز تَپه‌مه ووُروب باشیْمی داغلاییردی. هله ائوه چاتمامیْشدیم، یوْلوم اۆستۆ هر یاندا بیر کؤلگه‌لیک وار ایدی اؤزۆمۆ اوْرا سۆزدۆرۆب آزاجیْق دا اوْلموش اوْلسا گۆنه‌شین اوْدلایان قامچیْ‌لاریندان اؤزۆمۆ قاچیْردیردیم. اؤنۆمۆزده اوْلان گلن آی-یْن سیْناولاریْن دۆشۆنه‌رک محله‌میزه بیراز قالمیْش اوْلان پارک-ا چاتدیْم. قوُش بئله قاناد چالمیْردی اوْ بوْیدا پارکدا. ساعت هله اۆچ اوْلمامیْشدی دئیه‌سن گۆن اوْرتا چاغیْ‌نین یاندیریجی گۆنه‌شی هامینی قاچاق سالمیْشدی. آغاجلاریْن یاپراقلاریْ بئله دینج یئرلرینده دوُرموشدولار، بیر سیْراسی سوُسوزلوقدان اؤلۆشگه‌میشدی. بیر ایکی بالاجا پیشیک‌دن سوْنرا هئچ نه گؤزه چالمیْردی. پیشیک‌لرده آغاجلاریْن کؤلگه‌سینده دالدالانمیْشدی. هر دن بیر قاریْشقالارین یئیین‌جه گئتمه‌سینی گؤرۆردۆم، سانکی اوْنلاردا ایستی‌دن قاچیْردیلار، اوْنلاری آیاقلاماییم دئیه آددیْملاریمی گؤزله‌ییردیم بوُ ایسه یئریشیمی ایتیرمیش کیمی گؤسته‌ریردی آددیْملارین بیری بؤیۆک، بیر بالا اوْلوردو. قوُلاغیْما بیردن بیر بوْغاناق گۆلمک سسی گلدی، سسین کیمدن اوْلدوغو منی ماراقلاندیْردی باشیْمی قاوزاییب اؤنۆمه باخدیْم بیر گنج اوْغلان اوُشاغی ایدی. دۆز پارک-یْن اوْرتاسیْندا یئره اوْتورموشدو آچیْقجا دئسم یئره سریلمیشدی. هر ایکی قیْچینی آرالاییب قاباغیْنا اوُزالتمیشدی. آیاق قابیْ‌سینین بیری آیاغیْندان چیْخمیش بلکه‌ده چیْخاردیْلمیش یئره دۆشمۆشدو ساغ آیاغیْ‌نین دابانینی اوْنون اۆستۆنه قوْیموشدو آیاغیْ‌نین آلتیْ منه باخیْردی، سوْل آیاغیْنداکی آیاق قابیْ آیاغیْندا یاناکی دوُرموشدو اوْنون اوُجو ساغ آیاغیْنی گؤسته‌ریردی سوْل قیْچی ایله ساغ قیْچی سانکی بیر هاچا قوُرموش کیمی ایدی. اوْنون گۆن قاباغیْندا بئله اوْتوروشو منیم باخیْشلاریمی اؤزۆنه ساری چکدی. اؤز-اؤزۆمه " گؤره‌سن هاوانین بوُ ایستی‌لیگینده تک باشیْنا بوُرادا نه ایش گؤرۆر ؟ " دئدیم .سسی ائله آیدیْن دئییلدی آما نه ائتدیگینی گؤرۆردۆم. اؤنجه اللرینی بؤیۆرلرینه ووُروب بیلینر-بیلینمز باشیْنی ساغ-سوْلا ترپه‌دیردی، سوْنرا ساغ قوْلونو گؤیه قالدیْریب گۆله-گۆله باشیْنی قوْلونون بۆکۆجه‌گینه ووراراق بیردن ایکی قات اۆزۆ قوُیلو یئره دوْغرو گلیب بؤیۆک بیر سئوینجله یئردن بیر شئی گؤتۆرۆب یئنه قوْلونو گؤیه قالدیْریردی الینه باخاراق بیر شئی‌لر دئییردی آرا-سیْرا دا سؤزلرینی ووُرغولاماق اۆچۆن سوْل الینین بارماقلاریْنی اوْنا دوْغرو توتوب بیر سؤزلر دئییب الینده‌کینی یئنی‌دن یئره بوُراخیْردی. گئت-گئده اوْغلانا یاخیْنلاشیْردیم. اوْغلان لا آنجاق ۵-۶ متر آرامیْز اولاردی نه دئدیکلرینی دۆزگۆن ائشیدیردیم هئچ بیر سؤزۆ بۆتۆن دئمیردی سؤزجۆکلرین سوْنون یئییردی، اۆستۆ-باشیْ ایله اۆزۆنۆن بۆتۆن خیْردالیقلارینی داها آیدیْن گؤرۆردۆم .۱۳-۱۴ یاشلی اوْلان بوُ اوْغلانین باشیْ نرمال حالدا گؤرۆنمۆردۆ بیراز ایری ایدی، تۆکلری بیز-بیز دوُرموشدو، آلنیْ دیک هابئله بیراز آچیْق، گؤزلری یاسدیْ، اوُزون‌سوْ سانکی بیراز دا چئری‌لیگی وار ایدی، بوُرنو کیچیک اوْلسادا بوُرنونون اوُجونون دیک‌لیگی بوُرون باجالاریْنین گؤستریلمه‌سینه نه‌د‌ن اوْلوردو، آغزی یئکه‌دن، اَیری، آلت دوْداغیْ ایسه ساغ یاندان سانکی بیراز چکیلمیش کیمی اوْلاراق اۆست دوْداغیندان آرالی دوُرموشدو، بوْغازیْ‌نین ساغ طرفینده دامارلار زوْل دوُرموشدو بونون نه‌دنی ایسه باشیْنین بیراز سوْلا آخدیْغی ایدی.

اَگنینده بیراز کیرلی‌ده اوْلسا آغ بیر قوْل‌سوز کؤینک له پارچادان بیر شلواری دا وار ایدی. کؤینه‌گینین اۆستۆنده بیر یازی وار ایدی آما نئچه یئردن قات یئدیگی اۆچۆن اوْخویا بیلمیردیم ساده‌جه ایلک سؤزجۆگۆ اوْخویا بیلیردیم " یالنیز... " یازمیْشدی.

اوْنو بوُ حالدا گۆنۆن بوُ چاغیْندا پارکدا یالنیز گؤردۆگۆم منی داها آرتیْق شاشیْریردی. یاخیْنلاشیب آدیْنی سوْرماق ایسته‌دیم.
" سلام، یوْرولما. آدیْن نه‌منه‌دی ؟ "

ائشیتدیگیم سسه اینانا بیلمیردیم اوْغلانین سسی اوْلدوقجا درین دن چیْخیردی قالین بیر سسی وار ایدی.

" مم آدیْم تاپدیْق دی. شَن ؟ "

بیراز دیسکیندیم، اۆزه وئرمه‌دیم یاواشجا اؤسگۆرۆب اوُدقوناراق " شلاله " دئدیم. آرخا طرفدن بیر خیْشیلتی سسی ائشتدیم، تئز باشیْمی چئویریب اوْ یانا باخدیْم. ۴۸-۵۰ یاشلی بیر قادیْن ایدی گۆنش‌دن قاچاراق آغاجلارین کؤلگه سالدیْغی بیر صندل‌ده اوْتورموش ایمیش. یاخیْنلاشیب سلام وئردی سوْنرا :

" من تاپدیغیْن آناسی‌یام " دئییب " دیسکینمه‌یین سینسیتمز " دئیه دایاندی .

" بس تاپدیْق ایندی بوُردا نه ایش گؤرۆر؟ گۆنش ووُرسا کئف‌سیزلر آخی . " دئدیم قادیْن باشیْنی توْولاییب سؤزه باشلادی ، سانکی اۆره‌گینی بوُشالتماق اۆچۆن بیرینی آختاریْرمیش :

من، دا سیز ده باغیْشلایین تئز اره گئتدیم، البته گئتمه‌دیم ها قاچیْرتدیلار اؤز عموغلوم قاچیْرتدی. نئچه ایل سوُبای دوْلاندیق یانی اوُشاغیمیز دا اوْلموردو. چوخ نذر دئییب احسان وئردیکدن سونرا ... " قادیْن الی ایله تاپدیْغی گؤستردی. تاپدیْق اؤز ایشینده‌یدی. ایندی نه ایش گؤرۆردۆ اوْنو یاخشی گؤره بیلیردیم. اللرینی بؤیرۆنه ووُروب قیْچلاری‌نین هاچاسیندان چیْخماغا چالیْشان، اسیر دۆشمۆش قاریْشقالارا باخیْب گۆلۆردۆ، ساغ الینی گؤیه قاوزاییب بیردن اگیلیب قاریْشقالاردان بیرینی الینه آلیْردی قالدیْریب آلنیْ‌نین ترینی قوْلونون بۆکۆنه‌جگیله سیلدیکدن سوْنرا " شن بوُ دان گئه بی‌مزشن "

قادیْن گئنه سؤزه باشلادی :

" اوُشاق اوْلارکن اوْنو نئچه ایلدن سوْنرا تانری بیزه پای گؤندردیگینه گؤره آدیْنی تاپدیْق قوْیدوق. دوُرومون دا کی گؤرۆرسۆز. نه دئسه گرک اوْ اوْلا، آیریْ یوْلو یوْخ. "

بیردن تاپدیْق آیاغا دوُروب آناسینا دوْغرو گلیب " آ گه گئت " دئیه قادیْنین الیندن یاپیْشیب اوْنو چکمه‌گه چالیْشدیْ. قادیْن باشیْنی ترپه‌دیب منه هله‌لیک دئدی . تاپدیْق منه ساری دؤنۆب سینه‌سینی قاباغا وئریب گؤزلرینی بره‌لدیب دیلینی چیْخارتدی. گؤزۆم کؤینه‌گینین اۆستۆنده اوْلان یازی‌یا ساتاشدیْ :

" یالنیز بیر کروموزوموم آرتیْق دیْ "

گۆنش گؤیدن قامچیلاییردی، اۆره‌گیمین ایچی یانیْردی.

" ۲۱ مارت، دنیالیق سندرم داون گۆنو، بو کئفسیزلیگه توتوشان انسانلاری دۆشونه‌رک اونلارا داها آرتیق یاخینلاشماغیمیزی، اونلارلا یولداش اولماغیمیزی دیله‌ییرم. "