Kult.az گونئی آذربایجان‌لی شاعر علی زارعیان شاملینین شعرینی تقدیم ائدیر:

باهار نه دیر آ گولوم دؤرد فصیل قیشام اؤزومه
داریخما پنجره سیندن داریخمیشام اؤزومه

باهار نه دیر کی تؤکولدوم سن اؤپدویون غزلی
ائشیت خزان دی سسیم، سسله خیش خیشام اؤزومه

باهار نه دیر نه بیلیم بلکه «من» دی سنده یاتیب
اویالتماسان دا اویاق بیر قارانقوشام اؤزومه

باهار نه دیر منه لعنت گئدن سنی اوشودوم
سویوق باخیشلا ایناندیردی قارقیشام اؤزومه

باهار نه دیر؟ اسیرم یئل کولک له سئوگیمیزی
باریش اوچون گرکیر سنله تارتیشام اؤزومه-

باهار نه دیر دئییب آغلاتمیشام کاغاذ قلمی
قاییت-قاییت گؤیه ریب نغمه لر قوشام اؤزومه

باهار نه دیر کافه ده ایچدیییم او گؤزلرینی
گئییب اؤز اگنیمه سن سیز داریخمیشام اؤزوم