کولت آذ. گونئی‌لی شاعیر محرم ولی‌پورون شعرینی اوخوجولارینا تقدیم ائدیر:

کؤلگمده بیر وطن ساخلایام گرک
سینه سی قیرمیزی، زیروه سی گؤم گؤی
اته یی یام یاشیل، گؤیو اولدوزلو
یانیندا بیرپارچا آیی دا اولسون!

کؤلگمده بیر وطن ساخلایام گرک
دنیزی سالامات، چایی دوپ دورو
اونون هئیکلینده ساغلام یاشاسین
بیر وطن سئورین قوتسال غورورو
باهاریدا اولسون؛ یایی دا اولسون!
اونون هر چئشیتدن پایی دا اولسون!

آدام اولانمادیم؛ بیر آغاج اولوب_
کؤلگمده بیر وطن بسله مه لی یم
هر بیر یاپراغیمدا، هر بیر دالیمدا
وطن اؤزگورلویون سسله مه لی یم
اودلو اوره یینده دؤیونن دنیز،
آراز آدیندا بیر چایی دا اولسون!
شنلییی ده اولسون؛ وایی دا اولسون!

آرازیم! دَیمه سن ساراما داها!
داشیب جالانماسین یاراما داها!
آخسین؛ دالغالانسین؛ خزره چاتسین!
کؤلگمده بویویوب گؤیه بوی آتسین!
اونون اللرینده من ده گؤیه ریم
بلکه توپراغیندان اؤزومو دریم

کؤلگمده بیر وطن ساخلامالییام
اوره یی سئوینجک، دیلی بختیار
داغلاری ووقارلی، داشلاری یاقوت
اوباسی بختیار ، ائلی بختیار
ائلینین، یوردونون غمیندن اوزاق
منیم وطنیمین اوره یی گولسون!
نیسگیلی داغیلسین؛ غمی تؤکولسون!
چؤره یی ده اولسون، چایی دا اولسون!
اونون یاشام آدلی پایی دا اولسون!

یوخ؛ دایان! کؤلگه یه اولماز اعتیبار
وطنی، کؤنلونه اکه سن گرک!
اونا جان وئره سن؛ قان جالایاسان
هرآن کئشییینی چکه سن گرک!
کؤنلونده جوجه ره؛ سن دئین وطن
اوندا دوشونرسن آزادلیغی سن

کؤنلومده بیر وطن بیتیرمه لی یم
نه یانغینی اولسون؛ نه ده یاراسی
داغی قار ساخلاسین، باغی بار وئرسین
اولسون گؤزلریمین آغی، قاراسی.
منیم وطنیمین، گرک دونیادا
اؤلکه لر ایچینده سایی دا اولسون
گؤی، قیرمیزی، یاشیل یاراشسین اونا
اولدوزو دا اولسون؛ آیی دا اولسون!
هارایی دا اولسون؛ هایی دا اولسون...!