کولت. آذ ایسمایل خرمینین ایچیمده مورگوله‌ین بیر ساعاتام می؟ آدلی شعیرینی تقدیم ائدیر

ایچیمده مورگوله‌ین
بیر ساعاتام می؟

گؤز یاشلاریم ثانیه‌لرین تیک - تاکی!
اوره‌ییم اوچ کسیجی عقربه‌لرله دؤیونور:
قارانلیق،
یوخسول‌لوق،
دوستاقلیق.

باشیم کؤک فیرفیرالارینین
ال یئری!
اوزوم - گؤزوم اونون ائکرانی!
ال - آیاغیم اونلارین
گوناموزد فهله‌سی!

اوغرو بیر حیاتین
یارالاریندان دوغدو ثانیه لر.

قوش اولدو قاناد چالدی
اوشدو
دوشدو
ایچیمی بزه‌ین قافیه‌لر.

دویغولارین یاساق نفسیندن
سایدی‌لار منی.

اؤزومو من سایا بیلمه‌دیم
بیلمیرم نئچه‌یم ایندی.

ندن کؤکلن‌میشم
نه‌یه قورولموشام؟

کیمه نئچه گؤسته‌ریرم-
ساچیمدان آسیلمیش-
بورج بو حیاتی؟