Kult.az گونئی آذربایجان‌لی شاعره مهسا عبدالعلیزاده نین شعرینی تقدیم ائدیر:

بیرآز داریخماق ایسته ییرم دوستوم
سنی داریخماق ان گؤزل
داریخا بیلسم ،
باخیشلاریندا سنی داریخان
حئیوا آغاجینیزدا ییرغالانان
اینتحار پاندولو کیمی...
آنانین سنی ایتیردییی گله جکلر کیمی
سنی مندن سورانلارین قارشیسیندا
بوغازیمی قورودان هیچقیرتیلاریم کیمی...
بیراز منه داریخماق دادیزدیر دوستوم
سئویرم سنین داریخمالارینی
منه باخ....داریخیم
دوغرانمیش کلمه لرینین شعرلریمه قارشی جینایتدن سؤیله
سؤیله گئجه نین قولتوغونا سیغینمیش اؤزوندن ...داریخیم

بوراسی ستلجم یاشامیمیز ...توراخایلارین باشلارینی قاچیرتدیقلاری قار قدر سویوقدور بوراسی،
تیتره ییریک
سیلکه نیر قارتیمیش دویغولار ایچیمیزده
آیریلیریق ایت لیییمیزدن
و اینسانلیق لئشی نی سیچرادیر چئوره میزه
بوراخیر دووارلارا ایزینی
و یاییلیر شهره بیر بیریمیزی آنلایا بیلمه دیکلریمیز...
داریخماق ایسته ییرم
قادین لیغیمین یوز ایللیک قاتیندان آیریلماغیم گلیر
دوشه بیر اوره یینه،
اوره یینه دوشه بیلسم
و اوره ییمین سیخیلدیغی کیمی
اللرینی سیخسام...
گؤزلرین دیلیمه گتیره بیلمه دیییم اعتیراف
دوداقلاریمین قیراغیندان سیزان قیرمیزی لکه نین ایزی
گؤزلرین ایضطرابدی
ایچینده یم،
ائستیرئسدی
یوللار بویو چکیرم
داریخماق ایسته ییرم
دار...ییخدیر منه
داریخدیر منی ...