Kult.az موسا یعقوبون "بو دونیانین قارا داشی گؤیرمز" آدلی شعیرینی تقدیم ائدیر:

لئیلکلرین چؤپ یوواسی بوش قالیب،

باهار گئدیب، پاییز گلیب، قیش قالیب،
گؤی چمن‌ده اوجاق یانیب، داش قالیب،
بو دونیانین قارا داشی گؤیرمز.

نه بو اوجاق کؤزره‌سی، سؤنه‌سی،
نه او گونلر بیر ده گئری دؤنه‌سی...
غم ائلمه کؤنلومون بیر دنه‌سی،
بو دونیانین قارا داشی گؤیرمز.

او گولیاناق بنددیر خوش بیر باخیشا،
کؤرپه بوداق ال آچیب‌دیر یاغیشا،
مین باهارین حرارتی ییغیشا،
بو دونیانین قارا داشی گؤیرمز.

اوت گؤیردیب او جیغیریم، او ایزیم،
طوفانلانیب چالخالانماز دنیزیم،
داها من‌دن سئوگی اومما عزیزیم،
بو دونیانین قارا داشی گؤیرمز.

آراز بویو چوخ معنالار سئزمیشه‌م،
ائله بیلمه اللریمی اوزموشه‌م،
اورییمه داش باغلاییب دؤزموشه‌م،
بو دونیانین قارا داشی گؤیرمز...