Kult.az گونئی‌لی شاعر کیان خیاوین شعرینی تقدیم ائدیر:

هله یاشاییرام اؤلمه میش کیمی
هله بیر نسنه دن نه سه اومورام.
قاشلارین گیزینی بیلمه میش کیمی
سئرچه قانادیمی آچیب یومورام.

باشیمی بیر قارا فاجیعه سارار
دؤشومو بیر یاشیل دویغو یاراسی.
کؤکسومده بیر دنیز چالخانتیسی وار
اووجومدا بیر بالیق چالیقلاماسی.

اللریم تؤکولن پاییز یارپاغی
گؤزلریم چیله دیر،چیله گئجه سی.
بؤیرومه ساپلانان سیتم پیچاغی
اوره ییم کؤله دیر،سئوگی کؤله سی.

قوجاغیم داریخیر سئویشمه لره
هانی سیغیندیغیم او دیب اوتاقلار؟
دوداغیم داریخیر اؤپوشمه لره
هانی تاپیندیغیم او گول یاناقلار؟

آغاران ساچیمی کولک داغیدیر
شه هه ری قار-قیروو بورویه جکدیر.
قوشوقلار،اؤیکولر سانکی یاغیدیر
یورویور اوستومه،یورویه جکدیر.

یئنه ده قوشوقلار اووودور منی
یوخسا بو آداملار آجیدیر،آجی.
و اسکی سئوگیلیم اونودور منی
و اسکی دوستلاریم:سیتم قیلینجی.

مین لالا اکه رم،بیتمه دن سولار
آداملار نئجه ده سویوق اولارمیش!
زامانین شاشیردان اویونلاری وار
بؤیوک سئوگیلیلر اونودولارمیش!

آخ،داها ده رینه ایشله ییر یارام
اوره ییم توتولان گؤیون اوزویموش!
داها بیر نسنه دن نه سه اوممورام
یاشاماق اؤلمه یین باشقا اوزویموش!...