Kult.az گونئی‌لی شاعر مریم گؤزلینین "آذربایجان" آدلی شعیرینی تقدیم ائدیر:

بابک کیمی ایگید بالان

کلیبرده وار بَـذ قالان
اوْلماز سنی سندن آلان
باش اوجاسان سن هر زامان
آزربایجـان، آزربایجـان

مشروطه‌لی ستارخانین
نسیمی تک قهرمانین
اۆزۆنه چکدی اؤز قانین
دَریسی‌یله، سوْیولدو جان
آزربایجـان، آزربایجـان

یاغینی أزَن کوْراوْغلو
عئیواض‌لا دمیرچی اوْغلو
قیلینجی، نئیزه‌سی سوْولو
اؤزۆن پاشا، اؤزۆنده خان
آزربایجـان، آزربایجـان

نئچه قوْشا سئون‌لرین
باده وئرمیش أرَن‌لرین
سنسیز حایات سۆرَن‌لرین
گٶزۆ آغلار، اۆره‌یی قان
آزربایجـان، آزربایجـان

اوغوزلارلا باغلی نسلین
هم کٶکۆن بللی هم اصلین
نبی کیمی قوْچاق سسلین
دوروبدور قایغیندا هر آن
آزربایجـان، آزربایجـان

نباتی‌له، پروین یارین
طوطی دیللی شهریارین
اوْغلوندا گۆج، قیزدا آرین
ائل دردینی دویوب، یانان
آزربایجـان، آزربایجـان

دیللرده‌دیر سنین زورون
جان اسدیریر تیـراختــورون
داغیدیر هئی حریف تورون
مئیدانلاردا سالیر طوفان
آزربایجـان، آزربایجـان

تاریخده وار بٶیۆک ایزین
أسمه‌ییب هئچ‌ زامان دیزین
ووقارین داغ، روحون حزین
دۆشمن باغرین ائدن شان‌_شان
آزربایجـان، آزربایجـان

توْپراغینی ساتان یادا،
دۆشه‌جکدیر #یانار_اودا
اوزاق اوْلسون سندن قادا
اونوت غمی، کدری دان
آزربایجـان، آزربایجـان.