Kult.az گونئی آذربایجان‌لی شاعر اسماعیل خرمینین شعرینی تقدیم ائدیر:

سؤکولوب پورچوملر ایلمکلریندن.

آچیلیب محشرلر دوغدوغو یئردن.

چکیلیر اوزومدن، سارماشیق قارداشلیغی.

ایچیمیزه داریخیان

پیچاق شوشه لر،

بیزیم ایتیلیگیمیزدن-

بوراخیب پئشه سین،

ساتیب بیچیجی قایدالارینی.

آی اؤز الیله

شعره ییخیلیب

بو آخشام.

نغمه لر سوسودان یولچو یولداشیم !

سنه اوخشار قافیه لر یاغیر سمادان-

بو رسام بولودلار

شکلینی چکیر گؤزلریمیزده،

خاطیریمیزده.

الیمده نابدل

یازیر شعریمی

مرضیه قوینوما یاراشدیریر بئش آتیلانینی.

صمدله آرازلاشیریق

بوتون شعیرده.

تیتره ییر یوخوم

دیکسینیر گیلانار سئوگیم.

ساریلیر منیم اینتحار جیلیتغالی گؤدم سنه.

دویا بیلیرسنمی،

دویغولار فئستیوالیمی؟

بو آخشام منه قوناق اول،

اؤپ اؤپوشلری،

قور گؤروشلری

سؤک ایچیمده کین.

هله یول گئده بیلر

اوره ییمه باسدیغیم آغلیم.

اتوم کسر توکر عشقیمیز.

دیز چؤکدورر دیکتاتور اورکلری.

یوخولاریمی ساتیرام

قورخولاریمی جهنم یوخوسونا سورگون ائدیرم.

کیمسه سنسیز،

توتتا بیلمز اللریمی.

یازیرام هله...