Kult.az شاعر ائلوین پاشانین "بیز بورای دئیی‌لیک" شعرینی تقدیم ائدیر:

«هیی»دان گلیب «هو»یا گئدیردیم

یول‌دا بیر دوستومو گؤروب دئدیم کی؛- داریخیرام،

دئدی؛- بیز بورالی دئیی‌لیک…

…سونرا بیر داش پارچاسی گؤردوم،

مزارلیق‌دان بینایا باخیب «کاش» دئییردی.

…سونرا هاوانین توتولدوغونو،

گؤیلرین بولودلارین اوستونه چمکیردیینی،

یاغیشین باشلادیغینی گؤردوم.

…سونرا بیر سرچه‌نین

اومیدله قارانقوشا یووا تیکدیینی،

قووولموش ایشچی آرینین

چیچک‌دن عذر ایستدیینی گؤردوم سون نفس‌ده.

…منیم ده بیر توتوقوشوم وار

آزادلیق‌دان باشقا بوتون سؤزلری دئیه بیلیر قفس‌ده

…سونرا بیر گؤیرچینین سمادا اوچدوغونو گؤردوم،

صاحبینه گئدیب قاییتماغی اؤیرتمک اوچون.

…سونرا بیر ایتین ایسلانا-ایسلانا

دیشینه‌ن مسجیدین داروازاسینی اؤرتوب هوردویونو گؤردوم:

«ائی اینسان، ائی اینسان»

…سونرا یوواسی تاپدالانمیش قاریشقانین

آستا سسله قیشقیردیغینی گؤردوم:

«سولئیمان» «سولئیمان»

…سونرا ائوه گیردیم آستا-آستا،

آددیم-آددیم.

قفس‌دن توتوقوشونون سسی گل‌دی

سحر اوغلوما اؤیرتدیکلری‌می تکرارلاییردی:

«بونا دا شوکور- بونا دا شوکور»