Kult.az گونئی‌لی شاعر کریم احمدیاناین شعرینی تقدیم ائدیر:

گؤیلرین اوزونده بوْیلو گونشیم
دوغگیلان ایشیغا چوخ تامارزیام
دهشتلی زامان‌دی ، آجی‌لی گونلر
محبت ،سئوگییه ائله آرزویام

ألی بوش ، گوز دولو ،چنلی باخیشلار
یانسیدیر اؤزونو پاسلی آینادا
آددمین آتاندا دوروب بیر باخیر
یوخسولو زاماندا ، ألده اوینادا

گونشین یئرینه چیراق یاراماز
کوچه ده پارلایان ایشیق ساختادیر
آلدادماز گؤزومو ألوان شوشه‌لر
چوخونون ایشیغی بوران شاختادیر

بورادا ایشیقی بیزه ساتیرلار
آلیرلار نفسی قفس وئریرلر
کیچیلیر گون به گون أسن بایراغیم
وطنین کؤکسونه یارا سریرلر

گونش دوغماسادا ایشیق آنلارین
دریمدن چیخاجاق دان اولدوزلاری
ساختالار اولاجاق دوغرو بیر چیراغ
سیناجاق شهرین دونان بوزلاری