Kult.az هبیب ساهیرین شئیرینی تقدیم ائدیر:

اییل سولار اوسته تؤکولسون کؤلگه ن!
اوخشاسین کؤلگه نی، چشمه نین الی
قوی دئسینلر قوشلار: "گوللندی باغچا،
او ساریشین گؤزل باغا گله لی"

اَییل، حلقه لنسین سودا ایشیغین
اریسین سولاردا یاقوتی رنگین
قوی سنین شؤوقون، سنین شفقین
گوللو ایزلر آچسین بولاقدا درین

گل! سؤنن غروبون کهربا رنگی،
بویاسین حیاتین آغ پرده سینی
قوی دینله سین کؤنلوم غملی آخشامدا،
باغلاردا خزانین سون نغمه سینی

اساطیرین گؤزل معبوده سی تک
اؤز عشقینله یاندیر قارا کؤنلومو
او بایغین باخیشلا، تاتار گلینی!
پریشان ائیله مه یارا کؤنلومو!

او اودلو باخیشین منی سوزر کن
آچیلا روحومدا بیر اوفوق، اوندا
عشقین صوبحی کیمی ، گولر اوزاقدان،
ماوی پرده لرده سئحرانگیز دونیا

اَییل سولار اوسته، آخشام اولدوزو!
سئیر ائت آسمانین درینلییینی!
او ماوی عالمین اهتزازیندا،
قوی زولفون اوخشاسین سرینلییینی...!