من بئش یاشین‌دا ایدیم. رحمت‌لیک ننه‌م دویو تمیزلییردی. بیر دنه‌سی یئره دوش‌دو. ننه‌م اییلدی و آختارماغا باشلادی. ساغا-سولا باخیر، تاپماغا چالیشیردی. اوشاق‌لیق بودور، "ائهه ننه"دئدیم . "بیر دویو دنه‌سی اوچون بو قدر چالیشماغا، یورولماغا دیر؟

رحمت‌لیک ایلک دفعه سرتلشدی منه قارشی، عصبله آیاغا قالخدی.

"اوتوردوغون یئردن دانیشماق آساندیر" دئدی. "هئچ دویو ایستحصال اولونارکه‌ن گؤردونمو؟ اینسانلار نه قدر چتین‌لیک چکیرلر. بیر دویو دنه‌سین‌ده نئچه اینسانین گؤزونون نورو، آلین تری، امیی وار بیلیرسن‌می؟"

اوتاندیغیم‌دان قیپقیرمیزی اولموشدوم. اوستون‌دن ایللر کئچ‌دی. حقوق فاکولته‌سین‌ده طلبه‌یه‌م.

آلاین`این مقاله‌لرینی اوخویورام. بیردن دیکسیندیم.ننه‌می خاتیرلادیم. آلاین بیر اینسان یئرده بیر اینه گؤروب و اییلیب آلمازسا بوتون سیویلیزاسییایا قارشی خیانت ائتمیش اولار، دئییردی. اون دوققوز ایل اول ایدی. ایستوکهولما گئتمیشدیم. بیر اوتئله ائندیم. گئجه ایدی. سحر حاماما گئدن‌ده گوزگونون یانین‌دا ماراق‌لی بیر بیلدیریش گؤردوم. زحمت اولماسا تراش‌دان سونرا اولگوجونوزو زیبیل قابینا آتمایین. یانینیزدا بیر قوتو وار، اورا آتین. بیر اولگوجله بئله ایسوئچ پولاد صنایع‌سینه کؤمک‌چی اولون. دوزو معطل قالدیم. اوشاقلیغیم‌دان بری پولاد اشیا دئییله‌ن کیمی عقلا ایسوئچ پولادی گلیر. بیر چوخ اشیانین اوزرین‌ده "ایسوئچ پولادین‌دان حاضیرلانمیش‌دیر" دئیه یازیلاردی. بودور او اؤلکه ایستیفاده ائدیلمیش تک بیر کیچیک اولگوجون بئله زیبیل‌لییه گئتمه‌سینی ایستمیر، اونا صاحب چیخیر، گلن توریستلره خواهیش یول‌لو خبردارلیق ائدیردی.

یاپونلار سون درجه ساده، آزاد و مرحمت‌لی یاشایان اینسانلاردیر. ائولرینی مئبئلله، اشیا ایله دول‌دورانلار یاپونلارا گؤره روحه‌ن تکامول ائتممیش، حیاتین معناسینی باشا دوشمه‌یه‌ن اینسانلاردیر. بئله اینسانلار یازیق ائوینی مئبئل سالونونا چئویرمیش دئیه ایله‌نیرلر. بیر اینسانین گؤستریش اوچون اشیانین اسیری اولماغی نه قدر پیس حال‌دیر. واختیله یاپون اقتصادیاتی بیر چتین‌لیک‌دن کئچیر. داخیلی بورجلار، خاریجی بورجلار بوغازی کئچیر. دؤورون دؤولت باش‌چی‌سی مجلیسی چاغیریر. کورسویه چیخیر. وضعیتی اولدوقجا آچیق و تهلوکه‌لری ایله دانیشیر و دئییر: تانری شاهیدیم اولسون کی، یاپونلارین داخیلی و خاریجی بورجلاری سون قپیینه قدر اؤدنیلمدیکجه دویودن باشقا بیر شئی یئمه‌یه‌جه‌م. بو اینیم‌ده‌کی پالتاردانباشقا پالتار گئیینمه‌یه‌جه‌یه‌م. دئدیکلرینی ائدیر، ایسراف‌دان قاچماق کومپانییاسی باشلادیلیر. یاپونییا بوتون بورجلارینی اؤدییر. بو وضعیتین جمعیتین بوتون عضولرینی هئچ کیمین استثنا اولمادان احاطه ائتدیینی دئمه‌یه احتیاج بئله یوخدور.

یاخین گونلرده یاپون ایمپئراتورونون سارایینی گؤردوم. اللهیم، نه قدر ساده، نه قدر تواضعکار...

لازیم اولمادیغی حال‌دا ایشیغی یان‌دیرماق‌دا، سویو باغلامادان بوش یئره آخیتماق‌دا، گئجه پالچیق‌لی آیاققابیلاریمیزی تمیزله‌مه‌دن یاتماق‌دا، یئمک یئدییمیز قابلاری یومادان قویدوق‌دا بیز ده ظالملار صینیفینه کئچمیریک‌می؟

حیات چوخ اینجه، عقلا بئله گلمه‌یه‌ن اینجه‌لیک‌ده ایپلرله هؤرولموش‌دور.

هر شئی او قدر بیر-بیرینه باغلی‌دیر کی...