Kult.az یقوب نیکزادین شعیرینی تقدیم ائدیر:
‍

کیمسه سالامیما "علیکیم" دئمیر

کیمسه دورمور آیاغیما

کیمسه "خوش گلدین"ی دیله گتیرمیر

کیمسه

گؤروشومه الین اوزاتمیر

قیفیل گؤتورولمور دیل ، دوداغیندان

"هه" چیخمیرسؤزوندن

کیمسه نین قاینامیر قانی قانیما

منی تومارلایان

منی نازلایان

سئوگیمه "جان " دیین کیمسه جان اوسته

کفنی بیچیلیر

کؤچو باغلانیر

کیمسه سیزله میشم، یامان کیمسه سیز

کیمسه یه ارکیم یوخ

اوزومدن وار گلمیر

من اوزو قارا

کیمسه یه بیر قورو سؤز له ده

بیر یول

دئدیرده بیلمیرم "سئویرم سنی"

کیمسه یوخ یاتدیغی اوره ییمده ده

ایسته ییمه دییه " گؤزلریم اوسته"

بوردا

یاشامالی دئییلم داها

هر گونوم یئنی ایت بانی

گؤزلریم دره سومویو

نفسیم آغری قالاسی

سسیم قان قوخولو زهر تولوغو

دیلیم آجیلاشان ناغیل

آدیم قارا گونلو اوجاق داشی دیر

اوره ییم کیفیر آغاجی

دیله ییم آغ یئللی پاییز گلیشی

یاشاماغا سؤز وئرسم ده

گونده

بیر لوو خبر قوناقلیغی وار

ماتی مئیخاناسی

لوتو بازاری

صاباحیم

چنلی گؤرونور

کؤکه لیر نیسگیلیم

گولوشوم سولور

قالخیر گیزیلتی لر

گؤینه ییر آرزوم

اؤلومدن قورتاریب قاچا بیلمیرم

جنازه م داغیلیر شئعیرلریمه

لئشی قالیر سؤزلریمین

شاعیر دوغولورام

قادالی شاعیر

کیمسه سالامیما "علیکیم" دئمیر