Kult.az گونئی‌لی شاعر بولود قاراچورلونون "قورقود آتاما نیسگیللی سؤزلریم" آدلی شعرینی تقدیم ائدیر:

زاماندیر بیزلره فلک گؤز أییب
پولاد اوز قیلینجلار قیندا پاسلانیب
شاهباز آیغیرلارین پئیی کسیلیب
جیدا لار أییلیب، کندیر اوفانیب

اودالار تالانیب ائولر ییخیلیب،
مرد ایگیدلر اؤلوب، اورک داغلانیب
حاصارلار آلینیب، اوردو باسیلیب،
دوداقلار تیکیلییب، قوللار باغلانیب

آلتونلی بان ائولر تالانیب گئدیب
ائو یییه-سی گئجه کوچه ده یاتیر
بوز بالتا سی کیمی جومرد ایگید لر،
دیوار لار دیبینده پورتاغال ساتیر

کؤلگه لی آغاجلار کؤکدن قورویوب
بولاقلار کورلانیب، کهریز لر باتیب،
آلیجی قوشلارین قانادی سینیب،
آسلان یاتاغیندا تولکو لر یاتیب.

اوبالار دا نه توی، نه بایرام اولور،
نه قوپوز چالینیر، نه مرد اؤیونور،
نه بیر اوزان گلیر نغمه اوخویور،
نه بئدوی آتلارین ایچی دؤیونور.

لاله لی دوزلرده تیکان گؤیه-ریب
نه قوزو مله-شیر نه جئیران قاچیر.
قوشلاردا یوردومدان کؤچوب گئدیبلر
گؤیده نه بیر دورنا، نه سونا اوچور.

معیشت ایگیده آغیر یوک اولوب
کیمی باش گؤتوروب گئدیر سرگردان
کیمی بالالارین آلیر دیشینه،
قاچیر دیاریندان، دوغما یوردوندان!

دوو دوشوب دیرناقسیز نامرد الینه
دیشی باتان یئرین اتین قوپاردیر.
دیل آچیب دیلینده دانیشانلارین،
چکیر بوغازیندان دیلین چیخاردیر!

بیرجه دار گونلرین دار آخشامیندا،
خلقین احوالینا شافاق قان آغلار،
قهرمان ائلیوی نه گونه سالمیش،
گؤر بو قارا دؤوران، گؤر بو روزگار.

بیر اورک آرادان ایکی بؤلونوب
آیاق دا قانلیدیر، باشدا قانلیدیر
آغ ساچلی آنالار قارا گئیینیب
یاناقدا قانلیدیر، یاش دا قانلی دیر!