Kult.az حسین کریمینین "آنا دیلیمه" آدلی شعیرینی تقدیم ائدیر:

آلوولو سینه‌مین آهی ووجودومو کول ائدر.

اگر سو سپمه‌سه بو چئشمی-خونفیشان دیلیمه.

نه قدر گیزلدیرم دردی-عشقی اغیاردان،

اورک‌ده جوشه گلیر، غم اولور روان دیلیمه.

آنا دیلیم ائله شیرین‌دیر، جان‌دان ایسته‌مه‌لی،

آچان‌دا من دیل آنام چوخ دئییب‌دیر «جان» دیلیمه.

دیلیم شیرین‌دیر بال‌دان، اودور کی، غم یئمره‌م

اگر وورا آییلار نیش هر زامان دیلیمه.

غزل‌ده سئوگیلینی تورکه بنزدر شاعر،

گؤزل کلام ایله تورکو وئریبدیر جان دیلیمه.

منه‌م او تورک کی، بوخارا ایله سمرقند،

باغیشلاییبلار قارا خاله خوشبهیان دیلیمه.

دئیین او دوشمه‌نه دال‌دان چیخاردارام دیلینی،

قهررره‌م انگینی هر کیم دئسه یامان دیلیمه.

دیلیم گؤزل‌دیر، سؤزوم جمله سؤزلرین گؤزودور،

اؤزوم سؤزوم کیمییه‌م، باغلاما یالان دیلیمه.

فضیلت ائتسه‌ن الله یانین‌دا تقوادیر،

باتیرما تن ایله، ای مودعی تیکان دیلیمه.

بویورموش «اکرمکم عنده ربی اتقاکم»،

بئله بیان ائیله‌ییب ختمی-مورسلان دیلیمه.

گلین وئرک ال-اله دوشمه‌نین قازاق کؤکونو،

یئتیرمه زهرلی عقرب کیمی زیان دیلیمه.

کریمییم، دیلیمی راییجی-زمان ائدره‌م،

توجه ائتسه آغام صاحب-الزمان دیلیمه.