Kult.az گونئی‌لی شاعر محمد بی ریااین شعرینی تقدیم ائدیر:

آییل ای کارگر! بسدیر،
گوز آچ بیر خواب غفلتدن

جهاندا مرحمت اومما ،
بو قانوندان_بو دولتدن

سارالدین گول کیمی سولدون،
ازیلدین پایمال اولدون

بوکولدو قامتین غمدن،
قوجالدین درد و محنتدن

همیشه گوزلرین گریان،
سویوخدا آج_سوسوز_عریان

داش اولسا دیل له نر انسان،
گله ر جانه بو ذلتدن

الین بوش،ائوده ائولادین،
عیالین هر شیئه حسرت

سنی دیندیرسه لر دینمه!
قیزار شرم و خجالتدن

سنین سایه نده ظالملر،
توتوب کاشانه ده مسکن

آلیر ئوز کامینی هر گون،
مللک منظر بیر آفتدن

ایچه‌ر می، مست اولار دائم،
خیاباندا وورار وولتا

قیزارمیش گوزلری هر دم،
شیشر افراط شهوتدن

دگیل سن کیمسه دن اسگیک،
دئمک اولماز بونا دیرلیک

سنی آزاد ائدر بیرلیک،
بو زنجیر اسارتدن

آماندیر! فوت اولار فرصت،
چالیش اول حققینه صاحب

خیانتکاره توتو دیوان،
قصاص آل بی مروتدن.