Kult.az وحید ملکین "اعتصاب" آدلی حکایه‌سینی تقدیم ائدیر:

هر گون شهرین مئیدان‌لاریندا اعتصاب ائدن‌لرین ساییسی آرتیلیردی.

اونو سورغولاماق اوچون یئنی دن بیر مئتیرلیک سلولوندان چیخارتدیلار.

هر گونه تای هئچ نه‌ گؤرمه‌سین دئیه ایشیق کوریدورا (دهلیز) چاتمادان گؤزلرینی باغلاییب سورغو اوتاغینا آپاردیلار. دونن کی جوابسیز قالمیش سورولاری یئنه سورولدو.
_کیمدن دستور آلیرسان؟ باشچیز کیمدیر کیم دئییب اعتیصاب ائده‌سیز؟

اعتیصابچیدان سس چیخمیردی

_سیزلرین آجیلیقدان اؤلمه‌یینیز بیزه اؤنمسیزدی، بو ایشلرله بیزی زورا قویا بیله‌جه‌یینیزی دوشونمه‌یین.
کیمدن دستور آلیبسیز اعتیصاب ائتمه‌یه؟

بو دؤنه اینقیلابچی نئچه گوندن سونرا دیله گلیب دانیشماق ایسته دی:

_ گؤزلریمی آچ اعتراف ائله‌ییم

سورغوچو اونون گٶزلریندن قارا دسمالی آچدی. اعتصابچی گؤزلرینی سورغوچونون گؤزونه تیکیب دئدی

"دئسم سنین باشچین بیزه دئییب آج قالین اینانارسان می؟"

سورغوچو گولومسه‌ییب دئدی: "بوتون یولداشلارین سنه تای بو قدر آخماقدیرلار؟"

اعتیصابچی گوله‌رک دئدی: ائله‌دیر بیز سنین باشچی نین ایسته‌دییینی ائدیریک، او بو اؤلکه‌نی آج ساخلاماق ایسته‌ییردی بیز ساده جه اونون اوچون آج قالمیشق!!