کولت آذ گونئی آذربایجانلی تانینمیش شاعیر و میللی-مدنی فعال حبیب ساسانیانین "اؤلکه سینده" آدلی شعرینی تقدیم ائدیر:

اوْروجلوق گلمه میش بو ایل بۆتۆن شئی

باهالاشدی بو ایران اؤلکه سینده

مۆسلمانلار معافدیر مالیات دان

اوْروجلوق دا اوْ آلمان اؤلکه سینده

قورو ـ یاش خورمانین قیمت لرین دن

خبر وارمی رمضان اؤلکه سینده؟

دوْلاریله سوغان خورما یَه چاتماز

اوتوْز بئش مین! بو ویران اؤلکه سینده

گلیر یوْخ، یاتمیش آل ـ وئر، خالق قوْرخاق

قالیب چاش ـ باش و حئیران، اؤلکه سینده

فلاکت ده یاشیر ایرانلی، آنجاق

سۆرۆر کئف هاممی لبنان اؤلکه سینده

قان آغلیر ظولم دن قیس قوْورالاردان

سوسوبلار باغری لار قان اؤلکه سینده

نه قانون وار، نه قانونه اویان وار

دۆز ایش یوْخ ایندی قورآن اؤلکه سینده

« قوزو دیرناغینی باسماز قوْیون لار »

قضات ـ مأمور ـ نگهبان اؤلکه سینده

نفس چکمک داها جۆرمه دؤنۆبدۆر

پیشیک آسغیرسا، ایران اؤلکه سینده

باشا باش عؤمرۆمۆ ساوماق دا زوْرلا

یاکاموز سوسما، زندان اؤلکه سینده.