Kult.az اوستاد شهریاردان گؤزل بیر شعیر تقدیم ائدیر:

اولدوز سایاراق گؤزلمیشه‌م هر گئجه یاری
گئج گلمه‌ده‌دیر یار، یئنه اولموش گئجه یاری

گؤزلر آسی‌لی، یوخ نه قارالتی، نه ده بیر سس
باتمیش قولاغیم، گؤر نه دوشورمکتدی داری

بیر قوش، آییغان، سؤیله‌یه‌رک گاه‌دان ایگیلدر
گاهدان اونو دا یئل دیه لای-لای هوش آپاری

یاتمیش هامی، بیر الله اویاق‌دیر، داها بیر من
من‌دن آشاغی کیم‌سه یوخ، اوندان دا یوخاری

قورخوم بودو یار گلمه‌یه بیردن یاریلا صوبه
باغریم یاریلار، صوبحوم! آچیلما سنی تانری

دان اولدوزو ایستر چیخا گؤز یالواری چیخما
او چیخماسا دا اولدوزومون یوخدو چیخاری

گلمز تانیرام بختیمی ایندی آغارار صوبح
قاش بئله آغاردیقجا داها باش دا آغاری

عشقین کی قرارین‌دا وفا اولمایاجاقمیش
بیلمه‌م کی طبیعت نیه قویموش بو قراری

سانکی خوروزون سون بانی خنجردی سوخولدو
سینه‌مده اورک وارسا کسیب قیردی داماری

ریشخندله قیرجان‌دی سحر سؤیله‌دی: دورما
جان قورخوسو وار عشقین، اودوزدون بو قوماری

اولدوم قاراگون آیریلالی او ساری تئل‌دن
بونجا قارا گونلردی ائد‌ن رنگیمی ساری

گؤز یاشلاری هر یئردن آخارسا منی توشلار
دریایه باخار بللیدی، چایلارین آخاری

از بس منی یارپاق کیمی هیجرانلا سارالدیب
باخسان اوزونه سانکی قیزیل گولدو قیزاری

محراب شفق‌ده اؤزومو سجده‌ده گؤردوم
قان ایچره غمیم یوخ اوزوم اولسون سنه ساری

عشقی واریدی شهریارین گول‌لو-چیچک‌لی
افسوس قارا یئل اسدی خزان اولدو باهاری