کولت آذ واقیف نصیبین "صفوی بوتاسی" آدلی حکایه‌سینی تقدیم ائدیر:

ایسماییل همین، آل-قیرمیزی رنگ‌لی بوتانی باباسی شیخ جونئیدین باشین‌دا گؤرموشدو. اوشاق آغلی ایله اونو جانی قدر سئودیی مؤمن آداما گونشین هدییه‌سی حساب ائلمیش‌دی.

ایمکانلاری اولسا دا، همین یاشینا قدر باباسی شئیخ جونئید ده، آتاسی شیخ حیدر ده معلم توتماغا بیر احتیاج گؤرممیشدی. هالبوکی، بعضیلری بو ساحه‌ده اونلارین بیر-ایکی سنه ده گئجیکدیکلرینی سؤیلییردی. اوشاقلارین زئهنینین آچیلماغا باشلادیغی واخت‌دان اونلارین دونیا ایله تانیش‌لیقلاری اوچون علمین چئشیدلی ساحه‌لرینین اوزمانی معلملرین، همین دونیادا اؤزونو مدافعه ائده بیلمیی اوچون جنگاورلرین تعلیمینه احتیاجی هاوا و سو کیمی حساب ائدیردی.

همین ساحه‌ده فیکیرلری اوست-اوسته دوشن آتا، بالا نوه‌لرینه، اوغوللارینا ایلک تعلیمی اؤزلری وئرمیی قرارلاشدیرمیشدی. شئیخ جونئید حساب ائدیردی کی، اوشاغی حیاتا آیاق و دیل آچان‌دان سونرا جدی نظارتده ساخلاماق لازیمدی. هانسی ساحه‌یه مئییل و ماراغینی بیلدیکدن سونرا تعلیملرینی همین یؤنه یؤنلتمک گرکدی. شیخ حیدر اوشاقلارا ائرکن یاشیندان جنگاورلیک تعلیمینی، بیر نؤع، اویونبازلیغا بنزدیردی. اونلاری، ایلک نؤوبه‌ده، ایچینه دوشدوکلری حیاتلا تانیش ائتمه‌یه اوستونلوک وئریردی. یعنی اوشاغی اووا آلیشدیرماق، چایلارین، داغلارین یالمانینا قالخا بیلمیی اؤیرتمک ایستییردی. اونلار ایلکین قارشیلارینا چیخان حیات چتین‌لیکلرینه سینه گره بیلمه‌لی ایدی.

بو جور تعلیم سونراسی یئددیاش‌لی ایسمائیل بابا حسابی اول-اول اؤزویله تانیش دا بیلمیشدی (یعنی هانسی خالقین اؤولادی اولدوغونو اؤیرنمیش، اونون ایللر بویو توپلادیغی معنوی سروتلرله تانیشلیغینا باشلامیشدی. آتالار سؤزلریندن باشلاییب، ناغیللارین، داستانلارین یالمانینا یاتمیش‌دی).

آتاسی اونو بالیق، قوش اووو زامانی چایلاردا بالیق کیمی اوزمیی، داغلاردا قارتال کیمی سوزمیی اؤیرتمه‌یه چالیشمیشدی. ایسماییل طبیعته آیاق اچدیسی زامانی اطراف‌داکی گوللرله، اوتلارلا، آغاجلارلا، قوردلارلا، قوشلارلا دا تانیش‌لیغینا باشلامیشدی.

شیخ جونئید حیکمتلی کلمه‌لر سونراسی نوه‌سینین قولاقلارین‌دا اونون (و بشرین) ان بؤیوک قازانجی اولان اینسان‌لیغی سیرغا ائتمه‌یه چالیشمیش‌دی:

- رببیمیز بیزه شعورو بخش ائدیب کی، اونون یاراتدیغی دونیانین عادیل و قادیر صاحبینه چئوریلک. اطرافیمیزداکی یاراتدیغی جانلیلارا دا صاحب دوراق، دونیانی عقللا تنظیمله‌ییب جیزیغیندان چیخماغا قویمایاق. اینسان - شوورویلا (رحمی و عدالتیله) بو ایلاهی آدا صاحب اولا بیلر. اونو ایتیرسه اللری جایناغا چئوریلر، رام ائده بیلمدییمیز یالقوزاقلاردان بیر فرقی اولا بیلمز.

شیخ حیدر بوتون یارانیشلارین بیر-بیریله علاقه‌لی اولدوغونو، بیر-بیرینین ایشینی تنظیملدیینی سؤیلییردی. عبث یارادیلیشین اولمادیغینی ایسمائیلا آنلادیردی. دونیانی درکی سونراکی اینسان اول وارلیغینا، سونرا دا وارلیغا حاکم اولماغا چالیشمالیدی. ان چتین آنین‌دا کیمسه‌لردن کؤمک گؤزله‌میردی. چتینلیکلر اینسانلار اوچون سیناقلاردی. اونلاری دفع ائتمیی باجارمالیدی. دوشدویو قفس ایچره، آلدیغی نفس سوره‌سی اؤزو اؤز طبیبینه چئوریلمه‌لیدی. چونکی وارلیغی اوچون اطرافین‌داکی وارلیق‌دا بوتون دردلرین علاجی مؤوجوددو.

داوامی وار