Kult.az تبریزلی صرافین شعیرینی تقدیم ائدیر:

شرار شمع آهیمدان منيم، پروانه‌لر ياندې

اؤزۆم ياندېم، کۆل اۏلدوم، سهل دير، بيگانه لر ياندې

تجلاّی جمال جام غملن اؤيله سرگرمم
دوتوب اۏد، ياندې جانېم، بيلمه‌ديم امّا نه‌لر ياندې

اۆزۆم سويون اۆزۆم سويوندان اؤترۆ سو کيمی تؤکدۆم
خجالتدن سويا دؤندۆ مِی و ميخانه‌لر ياندې

دئيين مجنونا بيل بی‌خانمان اۏلماقلېغېن قدرين
شعاع حُسن ليلادان سراسر خانه‌لر ياندې

يانارسان، ای کؤنۆل! گل طرّهٔ جانانه چنگ اورما
نئچۆن مشّاطه‌لر چنگينده گؤردۆم شانه‌لر ياندې

بلا صحراسې اۏلجاق مسکنيم، بير آه چکديم کيم
دوتوب صحرالار اۏد، صحرانشين ديوانه‌لر ياندې

بو غم کُنجۆنده سنسيز، ای منيم شمع شب‌افروزوم!
پياپی آهېم ايلن مشعل شاهانه‌لر ياندې

محبّت بوته‌سينده يانمادې بير نقدی صرّافېن
بو سوز عشق ايلن چۏخ عاقل و فرزانه‌لر ياندې