کولت. آز تبسمعبدالّه‌زاده نین "یاتیب دونیا من اویاغام بیر ده یار" آدلی شئیرینی تقدیم ائدیر:

اوزاق‌لاردان آلۏو وورور اۆزۆمه

سایاق‌لاییر تب ایچین’ده سؤزلريم

یاخین‌لیق’دا شاختا کسیر کؤنلۆمۆ

بوزا دؤنۆر سنه باخان گؤزلريم

پۏزقون اۏلوب خاطیره‌لر اۏ قَدَر

سۏن باهارام نَفَس‌لریم سارالیر

داراق‌لانیر غم هاواسی ساچیم’دا

گئنيش دۆنیا گؤزلریم’ده دارالیر

باخیش‌لارین جهننم دیر یاندیریر

قوجاغین’دا یاشیل‌لیغین قۏخوسو

سن آجی‌سان چاخیر کیمی دیلیم’ده

بال دۏداق‌دان آخار سؤزۆن دوروسو

گئجه آغری آیاق قۏیور یاراما

بیر باخیشا بو یارانی بیر ده یار

قاران‌لیق’دی کؤلگه سالیب هر یانا

یاتیب دۆنیا من اۏیاغام بیر ده یار

سال قَفَسه یۏرولموشام اوچماق‌دان

قۏل-قانادیم اۆزۆلۆبدۆر اۆرَک‌دن

قاران‌قوشون یۏلچولوغو گـَرک دیر

گل منی اۆز بو درد اۏلان گـَرک‌دن