کولت. آذ گونئی آذربایجان‌لی شاعری آرش احمدینین شعرینی تقدیم ائدیر:

یورولدوم دونیانین اویونلاریندان
آیاغا دورماغا داها ندن یوخ...
ایتیردیم اؤزومو خییاوانلاردا
بیر یئرکی بیلیرم گلیب گئدن یوخ

بیر اینسان اؤزویله یاشاییر سورون
او قدر اوزگوندور او قدر یورغون
هرگئجه اؤلومون چیخاردیب شورون
اه‌ینیمه یاراشان هئچ بیر کفن یوخ

قوجاغیم خییاللار دونیاسی، اینان
سن ائولی بیر قادین، من سوبای اوغلان
بئله بیر یاساقدا یئتیشمز اینسان !
نئجه کی یاغیش سیز، سونبول ده دن یوخ

باخیرسان اوزومه آغلار گؤرورسن
کؤنلونده سئوگینی ساخلار، گؤرورسن
دئیه سن آرخامدا داغلار گؤرورسن
حئییف کی باشیمدا، دومانلا چن یوخ

نه قدر اوزاقسان نه قدر جاندان
قارشیما چیخارسان غفیلدن آندان
خاطیره اوستومه گلیر هر یاندان
گرچک ده دوغرودان بئله سئون یوخ