کولت. آذ ویدا حشمتینین اوشاق ادبیاتیدان "خیالچی سئوین" آدلی شعرینی تقدیم ائدیر:

گؤزل اوشاق ناز اوشاق
دیللره آواز اوشاق

آدی سئوین قیز ایدی
ائلین دادی دوز ایدی

شیرین اوشاق گول بنیز
خیال قوروردو بیر دنیز

بیر کپه نک وار ایدی
باغچا اونا دار ایدی

اودا سئوین بالا تک
ایسته میردی قالا تک

اولور سئوین له یولداش
یولداش دئمه ، دئ سیرداش

سئوین له او دانیشدی
خیالینا قاریشدی

سئوین بئلینه میندی
نه ایندی نه ده دیندی

کپه نک گؤیه قالخدی
سئوینین کؤنلو آخدی

باغچالاری باغلاری
گؤیه قالخان داغلاری

گزدیلر دولاندیلار
گؤیلره بویلاندیلار

بولودلار اویلاغیندان
آی اولدوز دوراغیندان

کیچیک اولدوزلار دردی
اته یی اوسته سردی

آغ قانادلی کپه نک
آرزی آدلی کپه نک

هر طرفی گزدیردی
بالاسی تک ازدیردی

سئوین اونلا دولاندی
بوینونا قول دولادی

آرزی دئدی برک یاپیش
ائنیریک تیپیش-تیپیش

سئوین ائلین گؤزلی
ائولرینین بزه یی

محکم یاپیشدی اونا
سیخیلدی قانادینا

یئتیشدیلر باغچایا
قوندولار آل قونچایا

سئوین یئنی دوست تاپدی
خیاللارینا چاتدی