کولت. آذ حبیب فرشبافین «دؤرد قارداش» حکایه‌سینی تقدیم ائدیر:

یونان اساتیرینه گؤره، یئر اوزرین‌ده‌کی بیرینجی ساییلان قادین پاندورانین بیر صاندیقچاسی وار ایمیش. بو صاندیقچانی آچماق قاداغان اولونسا دا، پاندورا امره اطاعت ائتمه‌ییب صاندیقچانی آچیر و اینسانین بو گونه قدر بوتون چکدیی بلالارین هامی‌سی آشکارا چیخیر. آنجاق صاندیقچانین تکین‌ده اینسانین توختاق‌لیغی اوچون، یالنیز بیرجه اومید قالمیشمیش. بیر سیخ مئشه‌نین درینلیین‌ده حیات بوتون گؤزللیکلری ایله اؤز آخارین‌دا ایدی. سولار شیر-شیر آخیر، قوشلار نغمه دئییر، آغاجلار موجور-موجور باهارلانیردی. بورا ایشیقلار دونیاسی ایدی..

دؤرد یانار اوجاق، دؤرد قارداش کیمی بو مئشه‌نین دؤرد بوجاغین‌دا اؤز قیزیل شفقلری ایله ایشیقلار دونیاسینین کئشیین‌ده دایانمیشلار. هر شئی اؤز قای‌داسین‌دا ایدی.
گونلرین بیر گونو قاران‌لیق دونیاسینین هؤکمدارینین یولو بو یئردن دوش‌دو. او، ایشیقلار دونیاسینی گؤررکه‌ن غضبین‌دن هوش‌دان گئدیب، آرخاسی اوسته یئره سریل‌دی. ائرته‌سی گون قاران‌لیق دونیاسینین هؤکمداری، بوتون قارا قوه‌لرینی باشینا توپلاییب ایشیقلار دونیاسینا هجوما کئچدی.
قارا قوه‌لرین هوجوما کئچه‌ن ایلبیس سئوگییه اؤلوم-دئیه، بؤیوک قارداش هدف آلیب، قاپقارا قانداللارینی دهشت‌لی بیر سسله بیر-بیرینه جالاراق، قورخولو بیر توفان قوپاردی. سئوگی شفقلری توفان‌دان تیتره‌سه ده، هله سئوگی اؤز یئرین‌ده مؤهکه‌م دایانمیش‌دی. بو دؤیوش اوچ مین ایل داوام ائتدی. نهایت، اونلار دؤرد طرف‌دن سئوگینی دؤوره‌له‌ییب، اونو توستو ایله اؤز قارداشلارین‌دان آییردیلار.
سئوگی اوجاغی سؤندوک‌ده ایشیقلار دونیاسی سارسیلدی. ایکینجی هجوم‌دا ایمان اوجاغی، اوچونجو حمله‌ده آرزو اوجاغی دا قارا قوه‌لرین اؤنون‌ده تسلیم اولدولار.
سئوگینین ایمانین و آرزونون ایشیغی، حرارتی کسیلدیک‌ده سولارین و قوشلارین نغمه‌سی ده کسیل‌دی. بئله‌جه ده بوتون چیچکلر سولوب، یارپاقلارسا بیربه بیر خزلله‌مه‌یه اوغرادی. قاران‌لیق گئت-گئده بوتون گؤزل‌لیکلری آرادان آپاریب، محو ائتمه قرارینا گل‌دی.

نه یاخشی کی، اومید هئچ زامان قارا قوه‌لرین گؤزونه گؤرونمه‌ییب، اوریینه یول تاپمیر. اونلار بوتون اوجاقلاری سؤنموش گومان ائدیب گئری چکیلمیشلر.
آرتیق دؤردونجو اوچ مین ایل گلیب چات‌دی. ایشیق‌لیق حکمداری دیزلرینی قوجاقلاییب:

-دؤوران بئله گئدرسه، قاران‌لیق بوتون عالمه حاکم اولوب، داها بیر قیغیلجیم دا گؤزه گؤرونمه‌یه‌جک-دئیه درین-درین دوشون‌دوردو.
بو آندا ایشیق‌لیق حکمداری اوزاقلاردان گلیب قولاغینا چاتان بیر سسی ائشیت‌دی:

-آیاغا قالخ! اوتورماق زامانی دئییل. من هله سؤنممیشه‌م. منی علینه آل، سئوگی و باشقا قارداشلاری‌می یئنه ده آلوولان‌دیر!

اومید اوجاغین‌دان گلن بو سس اونون اوریین‌ده شؤله‌له‌نیردی. ایشیق‌لیق هؤکمداری درهال آیاغا قالخ‌دی و ایلک اؤنجه سئوگی اوجاغینی، سونرا ایسه ایمان و آرزو اوجاقلارینی دا یاندیردی. یئنه بوتون عالم نورا بویان‌دی. هر شئی اؤز قایداسینا دوشدو…