کولت. آز گونئی آذربایجان‌لی شاعر اسماعیل خرمینین شعرینی تقدیم ائدیر:

اوره‌ییمیزدن سیییراریق
دویغو قیلینج‌لاریمیزی.
قیلینج‌لاری، ایتیلتمه‌یه
گوجو چاتماز دیلیمیزین.

گؤزلریمیزه چکه‌ریک،
قیزارمیش یاناق‌لاریمیزدا
ایتیلده‌ریک-
بو نازراعیل سئوداسی‌نی.

آغزیمیزین شیفره‌سینی بیلمه‌ریک.
بوغازیمیزین آدرسی ایتمیش-
گولوش‌لریمیز یان کئچر،
توپراغا تاپشیریلمیش-
قیشقیریق‌لاریمیزدان.

یوخودان دیک آتیلار ال‌لریمیز،
باشین ایتیره‌ر،
اسمه‌جه توتوب یولون آزار.
بیر – بیرینه سیخیلمیش
بارماق‌لاریمیزدان.

عاغیل‌لی اولوب،
دونیانین قهرین چکینجه،
دلی اولوب بیزیم قهریمیزی
چکسین‌لر دییه،
آیریلدیق باشیمیزدان.

ایچیمیزدن آیاغا قالخان‌لار،
گونده دؤیه‌ر بیزی.
دامارلاریمیزدان کندیر ائشیب،
دارا چکمک ایسته‌ر-
بالاسینی یئمیش اوره‌ییمیزی.

گؤده‌میزه بتون می توتموشوق؟
قورقوشوم مو اوتموشوق؟
"سئویرم سنی" سؤجویو ده،
دلیک آچیب کئچه بیلمیر بیزدن.

بئله‌سینه می اؤرگتمیشدیلر بیزی؟
بئله‌سینه می اؤلمک ایسته‌ریک؟