کولت. آذ اوستاد شهریارین "من‌دن قاچان آهو" شعیرینی تقدیم ائدیر:

گؤزلریمین قاراسییلا یازدیم بو ظریف غزلی،

بلکه سؤزوم رام ائیله‌دی سنین تک آهو گؤزلی.

آغارتدی گؤزوم گیله‌سین صوبحه دک هیجران گئجه‌سی،

بیر صاباحین اومیدیله درده، سیتمه دؤزلی.

گنجلیگیمی پوچ ائیلدین، حسرتین قوجالتدت منی،

گئت، ای جوان، قوجالاسان قمخاریندان ال اوز‌لی.

گؤزومون سئوینج یاشییلا سروتک اوجالتدیم سنی،

بویون اؤزگه‌سینین اولدو، بارسیزدیر عشقین از‌لی.

آی جامالین تیلسیم‌می آیدان سوروشارام گئجه،

نئچین مهرین یوخودور منه، دیلی، دوداغی مزلی؟!

باهاریم‌سان، بیر بولبول‌دن سوروش منیم احوالی‌می،

گؤز یاشیما ناخیش سالدی عؤمور باغیمین خزلی.

بوغاناق دا من‌دن آلدی بو شؤوقو کی، دیوان تک

قاچیب یایسین داغا، دوزه دردیمی کؤهنه-تزلی.

کؤینییمین یاخاسینی ال آتیب جیرماق ایستره‌م،

باشینا هاوا گلنین یاخاسین ییرتار اؤز الی.

بوکوک بئل‌لی چهره فلک ساچی‌می پامبیق ائیله‌دی،

زال اولسام دا، جان دوشمنیم حاضردیر الی نیزه‌لی.

شهریارین اوریی ده یاریلمیش بیر نارا بنزر،

تؤکولوب دنه سؤزلری، قالیب قوروجا گزلی