کولت.آذ سحر خیاوینین شئیرینی تقدیم ائدیر:

گئجه نین حوکمودو آقوزوم بالام
یئنه ده دیلینی گَل توپور دئییر
یئنه ده دوشمانلیق آنا دیلین له
بیر آیری بویادا،باشقا دون گئییر

دئییبلر یابانجی اوزگه دیلینه
کیچیک کَن احاطه ن اولماقین گَرَک
گئجه نین حوکمودو،قودرت الینده
ناچاریق نازلیجام حوکمه نه دئمک؟!

اولسون گئت آنانین دوعاسی سَنله
تورکجه لایلامی امما اونودما
آغزیندا گوووشه سن یابانجی دیلی
ائشیک ده توپور تئز آماندی اودما

درسینی اوخوسان یابانجی دیلده
اونودما اردملی ائلین وار سنین
قوچاقلیق دولو بیر قانلی تاریخین
ساوالان بالی تک دیلین وار سنین

اوخو قوزوم،بالام بلکه ناچاریق
گرک بو گونلَره دوءزَک بیر تَهَر
اوزولمه بالامسان آتالارین تک
بیر گون دان یئریندن دوغاجاق"سَحَر"

اینانما پاییزلا قول-بویون اولدوق
قوروموش بوداقلار جوجَره جکلر
بوگون اکدیگیمیز تورکو توخوملار
یاشیل یازیمیزدا بار وئره جکلر

یادیندا ساخلا سن آنا اوگودون
من ده قلمیمله دوشمان اوواجام
یئنه آند ایچیرم "دده قورقودا"
نوه مین آدینی"بابک"قویاجام