کولت. آذ تورکان اورمولونون شعیرینی تقدیم ائدیر:

نه بیر کاغاز ایمضالادیق بیرلیکده

نه بیر آیه اوخوندو

او کوتسال کیتابین حؤکملریندن

محرمییتیمیزه دایر

شاهیدلرین محظرین‌ده

آدیم یازیلمادی

ارککلیک کیملیینین ناموس صحیفه‌لرین‌ده

بیلیرم

عقل‌لی قادینام هه

سزیرم

گؤروره‌م

من سنین هئچ بیر زامان

هئچ بیر کسین اولمادیم

اولمایاجاغیمی دا

چوخ یاخشی بیلیرم!

یالنیز

سئوگیمی؟

سئودامی؟

توتدوغوم او چیلغین شیین آدی؟

بیلمییرم ...

دوشدو گؤزلریندن جانیما

دپ دلی بیر دولولوق!

دئییرلر یانلیش

سونو بوشلوق!

دویماییرام ...

چونکی حیاتیمین تک گرچک سؤزجویو

سن!

گؤره‌ن سوچلاسین منی

دیشلاسینلار

داشلاسینلار

راضییام

آخی سن‌دن واز کئچمه‌نین یوللارینی من

نه بیلیرم

نه ده بیلمک ایستییرم ...