کولت. آذ ناصر دؤورانین "یوخولاریم" آدلی شعیرینی تقدیم ائدیر:

نه یاخشی کی یوخودان اویاندیم

یوخسا یولسوزلار

آروادیمی‌یاریم چیلپاق

چارپایی‌یا باغلاییب

دؤیه‌جکدی‌لر.

نه یاخشی کی بیرداها

یاتاغا دؤنمه‌دیم

بیرداها یاتمادیم

یوخسا قامچی گزدیرن آدامجیل‌لار

یازیق آروادی

بیر یانلیق ائلردیلر

اؤلدورمه‌یینجه ال چکمزدیلر

بلکه ده ایراق اولسون… .

قورخومدان یاتا بیلمه‌دیم

باشیمی‌کیتابلا قاتدیم.

پاییز گئجه‌لری ده کی قورتاران دئییل

هاچاندان‌هاچانا دان یئری قیزاردی.

ایش یئرینده بایغین کیمی‌یدیم

هم یوخولو

هم ده سکسکه‌لی

آخشاما دک ائله بئله.

جاوان یاش‌لاریمدا

دؤزوملویدوم

قورخمازدیم

جاوان یاش‌لاریمدا

بئله بیر یوخو گؤرسه‌یدیم ده

گؤرمزدیم

هر گئجه تزه‌له‌نن یوخومو.

فیلسوف اولموشام

گئجه‌لر یوخودان دیکسینیب

صبحه کیمی‌بیر کتاب چیخیرام.