کولت. آذ گونئی آذربایجان‌لی شاعر یعقوب نیکزادین شعرینی تقدیم ائدیر:

منده دیرچلمه ده اوجقاردا قوجالمیش دلی لر
ائرته دن اوستونو جیرمیش، لووا قالمیش دلی لر

دونن آخشام چاغی چاغداشلادی چاللاشمالارین
هاوا گلمیش باشینا یولدا یاهالمیش دلی لر

آغریسین یُوخلامادی کیم ، یارا قایساقلارینا
گؤزلرین زیلله دی هئی بئینی قارالمیش دلی لر

قولاغی دوشدو سسه، گئتدی چییین لرده آدی
دونیانی، ایت کؤکو تک هئی یولا سالمیش دلی لر

هئچ آییرد اولمادی آغدان قارا، چؤکدوکجه سوکوت
لنگیدی گولمه یینه دردی ساغالمیش دلی لر

قوللاری کؤکسونه چارپاز، اوفاق ایستک لرینین
سئوگی حسرتلی الیندن اییین آلمیش دلی لر

من گؤز آلتی سوزورم روحومو، اول گیزله نه رک
جانیخیب بوی ـ بوخونو آهلا اوجالمیش دلی لر

چوخ گؤزللرله یوووشدوم یئتیشم زیروه لره
آغلیما گلمه دی هئچ دردی چوخالمیش دلی لر

چوخ ایشیق اومما بوغومتول یاشایان پنجره دن
نازلی دوزلوقدا قیلینجین گؤیه چالمیش دلی لر