سحر چاغی یوخودان كال كیمی دوروب، گئجه‌د‌ن قالمیش قانلی پیچاغی یویاراق، گیجه‌له-گیجه‌له گئیینیب، خییاواندا اوزو آشاغی دیغیرلانیرام. بیر تاكسی‌چی اؤنومده ساخلاییر و فرمانین آرخاسیندان باشینی آشاغا أیه‌ر‌ک، منه زیلله‌نیر.

-"گئتمیر‌م قارداش"! دئییر‌م.

بیر آز دا دایانیب باخیر و باشینی بوللایاراق سوروب گئدیر. آرخاسیجا ماشینا باخیرام و سوروجونون ایشینه شوبهه‌له‌نیر‌م. قاباقدان بیر قادین گلیر. اوشاغی‌نین الیندن یاپیشمیش، منی گؤره‌ر‌ک دیكسینیب، دوداغینی دیشله‌ییب سوووشور. دؤنوب قادینا باخیرام و آددیملادیغیم یئرده قادینین گؤستردییی تپكی منی فیكیره دالدیریر. دؤرد نفر گنج قیز بیر-بیری‌یله دانیشیب گوله-گوله خیاوانین اوتاییندا یئریدیکلری یئرده، منی گؤره‌ركن دایانیب شاشقینجاسینا بیر-بیرینه باخیب، باشلارینی توولاییرلار. سانكی اؤلو یئیه‌ن گؤروبلر. یاواش-یاواش اؤزومه شک ائدیب اوستومه باشیما باخیرام. زیپیم آچیقدیر، یوخسا باشیمین توكو بیز دایانیب؟! كؤینه‌ییمی ترسینه گئیمیشم‌می، یوخسا شالواریمین آیاغی جورابیمدا قالیب؟!

هر یولدان كئچن، هر آراباچی، توكانچی و بوتون شهر منه باخیر. بیر شهر گؤز داشی‌ییرام اؤزومله بیرگه، خییاواندا یئریدیییم یئرده. بدنیمه تیكیلمیش گؤزلر، قیییق كیمی سانجیلیب گؤوده‌مه.

خیالا دالیرام. دونن یاپدیغیم جینایتی دویوب مو شهر؟!

شهرین اورتا قوووشاغینا یئتیشه‌ر‌ه‌ک، همیشه آچیق اولان قفه‌نی باغلی گؤرور‌م. بیر یازی قفه‎نین شوشه‌سینه یاپیشدیریلمیش. یازیدان هوركه‌ر‌ک، الیمده‌كی آلمانین چؤته‌لینی یاواشجاسینا آرخین ایچینه دیغیرلادیب آغزیمی سیلیر‌م.

"قفه ایفطاردان سونرا آچیلاجاق..."