کولت. آذ خسرو باریشانین "عاغیللی‌لار شهری" آدلی شعیرینی تقدیم ائدیر:

عاغیللی‌لار شهرینده
نه گؤردوم درددن ساوایی؟
هر جوره آدام دوغولور،
یاشاییر، مرددن ساوایی!

بولودلاریندان غم یاغیر.
یوکوم تن گوجومدن آغیر!
چاراسیز، مجبور اینسانلار
باخیر منه فاغیر-فاغیر..!

یاغیشدا یویونان بو شهر
دومانلار شهریدیر یقین؛
سنسیزلیک گئیینیب شه‌هر
آه چکمک نه قده‌ر چتین!

بو شهرین ویترینلرینده
مانکن دوزولوب یان-یانا!
روحوموزا حؤکم ائدیرلر؛
آجیق وئریرلر اینسانا!

بو شه‌هرین گؤیلرینده
سنین گؤیرچین اَللرین،
اؤیره‌دیر منه اوچماغی،
دئییر: «ـاؤلومدن قاچگیلن
تاپ یاشاماق دلیل‌لرین.»

تابلو دولو بو شه‌هرده
تانریم نییه یول آزیرام؟!،
یئنه سنی یامسیلیرام؛
اوتوروب شعیر یازیرام.

بیر درویشم، یول گئدیرم؛
منیم کشکولومدور شعیر.
کشکولوم دئییل اینجیدن،
اؤزوم اؤزومو اینجیدیر.

شاعیر، ایشیق قاچاقچیسی…
بو شهرین دووارلارینا
قارانلیقلار دیرماشیرلار!
گئجه گئییملی آداملار
شاعیر، کؤلگه‌نده یاشیرلار!

بو شولوق شه‌هرده یالنیز
کیتاب ایچینده ایتیرم!
کیمسه منی باشا دوشمور،
اؤزوم اؤزومه یئتیرم.

بو بؤیوکلوکده شه‌هرده
جیسمیم روحوما دار گلیر.
فیکریم بوتون قابار چالیر؛
دردسیزلر دردلینی اَلیر!

گؤی‌دَ‌لنلر شه‌هرینده
گوجسوزو اَی، گوجه اَییل.
شاعیر اولماسام، بیلیرم
یاشاماق چوخ چتین دئییل.

بو‌هایلی، ترافیک شَهرده
چاتانمیر سئون سئونه؛
یوخسا آراجلاری داشقا؟!
هر زادی من یاریمچیلیق
یاشادیم، قورخودان باشقا!

عاغیللی‌لار شه‌هرینده
اصلینده من بیر دلی‌یَم.
عاغیللی رولون اوینورام،
شعیرلرین من وئلی‌یم.

آخشام اولان بو شه‌هرده
آداملار دئییل قاییدان،
یالقیزلیقدیر، یازیقلیقدیر
دؤرد دووارینی آییدان،
ائو دئدییینه قاییدان!

بو شهرین کوچه‌لرینده
نه گزیر درددن ساوایی؟!
بوتون آداملار ساتیلیر،
اؤلور، نامرددن ساوایی!