کولت. آذ سید مرندینین "قیرمیزی" آدلی حکایه‌سینی تقدیم ائدیر:

باشدان اته‌‌یه قیرمیزی گئییملی جوان ‌قادین سیگار ساتانین میزینه چاتیب؛ بیرشئی دئمه‌دن سلام وئرمک اوچون قیرمیزی لبه‌دارینین قیراغیندان یاپیشیب باش اَیدی. سونرا سس چیخارتمادان یاواشجا سیگاراچی‌نین آرخاسیندا اولان تؤرتؤکونتولو؛ قارانلیق پیلله یولونا ائییلیب، کوهنه صندلی‌نی گؤتوروب پیاده‌روون کناریندا، خیاوانا یاناشی قویدو. قیرمیزی پالتوسونون اته‌گینی صافلاییب، دیزلرینی بیربیرینه یاپیشدیریب یوموشاقجا صندلی‌نین اوستونده اوتوردو. اللرینی اووشلاییب سانکی بیرگلمه‌یی گؤزلور؛ کیرپیک چالمادان بیر-بیرینه قوووشان یئر و گؤی اوزاقلیقلارینا گؤز تیکدی.

گلیب گئدنلر بو قیرمیزی گئییملی جاوان‌قادینی گؤرونجه، چاشقین حالدا سیگاراچییا باخیب ایشارتله قادینین کیم اولدوغونو سوروشوردو. سیگاراچی؛ دوران آدامی سایمادان؛ اؤز ایشینه باش قاتیردی. نظری جلب اولونان آدام اگر چوخ دایانسایدی و یا سیگاراچیدان ایصراریله، قادینین کیم اولدوغونو و یاهوت اوردا اوتورماق نده‌نینی سوروشسایدی، سیگاراچی اؤنجه دوداغینی بوزوب سونرا باشینی ساغا- سولا دبردردی‌کی:

-" هئچ، بیرشئی دئییل، چکیل‌گئت........"

اگر یولجو گئتمه‌ییب آرتیق دایانسایدی، سیگاراچی مهربانسیزلیقلا الینی ساغا- سولا دبردردیب، دیشلرینی قیجیردیب : " دایانما، رد اول گئت." دئیردی.
قیرمیزی گئییملی‌قادین، کیمسه‌یه باخمادان و کیمسه‌نی سایمادان، خیاوانین اوزاقلیقلاریندان گؤز قوپارتمیردی. هردن سانکی بیر نَفَرین اللریندن توتوپ؛ قیرمیزی الجکده اولان بارماقلارینی اؤنده و یوخاری ساخلاییب، باشینی بیرآز گؤیه قالدیریردی. گؤز بوجاغیندان یاش دامیب دوداقلاری تیتره‌ییب، اوزونده یالوارماق قیافه‌سی توتولوردو.
قادین هرگون سحردن- آخشامادک، اون‌لار دفه بو قیافه‌نی توتوب و هامان سؤزلری قافاسیندا یئنی‌لیردی. هر زامان قافاسینداکی کیشی‌، اؤنونده جانلانیب اونا باخیب گولومسوردو. قادین؛ کیشی‌یه اوز توتوب، بارماقلارینین اوجوندان یاپیشیب یالواریردی:

-‌ نه اولار گئتمه‌دا ! منی کیمه تاپیشیریپ گئدیرسن؟!

اؤنونده‌کی اوجا بویلو و دوروشوکلو کیشی محبتلی گولومسویوب جوابلیردی:

- منیم یاقوتوم قورخما! بیر شئی اولماز، تئز قاییداجاغام.

- نییه سنی یوللاییرلار؟! بیلمیرلر تازا ائولنمیشیک؟! بیلمیرلر نقدر بیر- بیریمیزه باغلییق؟! بیلمیرلر سن شاه‌دان اؤتروسن، قابوس‌دان اؤترو دئییرسن. بیلمیرلر سن ایرانی قورومالیسان ظوفّاری یوخ ؟! آخی ظوفّاردان بیزه نه؟!

- یاقوتوم! تک من دئییرم‌، چوخلو خلبان و اردو آدامی گئتمک زوروندادی. اعلیحضرتین امریدی. گئتمه‌سم اعدام اولوننام. ظفّاردا کومونیستلر عصیان ائدیبلر. گئدیب عصیانی باسدیرماساق، بوگون- صاباح شپه‌سی بیزه‌ده توخدار. بیرگونده ایران‌ کومونیست‌لرین الینه دوشوب کومونیست اولار. بیرده‌کی بیزه‌ چوخلو مأموریت پولو وئره‌جکلر. قاییدیب آپارتمانیمیزی دئییشیب بؤیوده‌ریک.

- من بؤیوک ائو ایسته‌میرم. سنسیز ائوی؛ حتتا دونیانی‌ بئله ایسته‌میرم؟ من قالمیشام اوشاغیمیز دونیایا گؤز آچسا، اونا نه دئییم؟ آدینی نه قویوم؟ نازی‌نی نه‌جور چکیم‌!؟
کیشی گولدو:

- قیز! اؤلماغا گئتمیرم‌کی! بو سؤزلر نه‌دی دئییرسن! مأموریتیم بوقدر سورمز. ایکی- اوچ آیا دؤنه‌رم. گونده سنه‌ مکتوب یازاجاغام. بو آرادا اوشاغیمیز اوغلان اولسا، آدینی کیشیلر کیشی‌سی‌ احترامینا علی قوی، قیز اولسادا آدینی ایکی دونیا خانیمی‌ احترامینا فاطمه قوی.

آرواد آغلاییردی. ایسته‌میردی الینی کیشینین الیندن قوپارت‌سین. کیشی گولومسه‌ییب دئدی:

- ندن قورخورسان یاقوتوم؟ تک دئیرم‌کی. یوزلر نفریک. سونرا اوشاقلارکیمین آرتیردی: سن یئره توپور، قورویونجا قاییدارام باااا.

کیشی زحمتله بارماقلارینی، آروادی‌نین الیندن اوزوب، گئری دونوب الینی وداع اوچون دبردیپ اوزاقلاشدی. کیشی گئتدی- گئتدی- گئتدی؛ اوزاقلاردا افق‌لارا قاریشیب محو اولدو.
بو حئینده قادین آغلییا-آغلییا بیلمه‌دن وداع اوچون الینی قالدیریب بارماقلارینی بوش هاوادا ترپه‌دیب آجی گولومسه‌دی.

قادینین قافاسی ائوه دؤندی. اری مأموریته گئدندن سونرا، یالقیز ائوده، گون گئچیرمک اوچون ائو ایشلرینه باش قاتدی. گونلری و ساعتلری سایدی تا اریندن بیر مکتوب و خبر گلسین. هر زمان پوستچونون یولونو گؤزلردی. پوستچونو گؤردوکده چیچکلری چاتلاردی. اوره‌یی دؤیونردی. دؤزردی پوستچی مکتوبو وئریب گئری دؤنسون. مکتوبو اؤپوپ ایی‌له‌ییب، تله‌سیک آچیب دفعه‌لرجه اوخویاردی.

بیرگون قاپینین زنگی چالیندی. پوستچو دوشونجه‌سیله تله‌سیک قاپییا ساری قاچیب قاپینی آچدی. قاپینین اؤنونده ایکی دژبا‌نی گؤررکن اؤره‌‍‌‌یی بیلمه‌دن تاپیلدیا دوشوب، قاپی تایینا دایانیب رنگی قاچدی.

دژبانلار، نظامی احترام ائدیب چاس قووزادیلار. سونرا دینمه‌دن، بؤیوک بیر ساری مکتوب پاکتینی اونا ساری اوزاتدیلار. آرواد مکتوبو آلارکن گینه احترام ائدیب گئری دونوب اوزاقلاشدیلار. آروادین قلبی چیرپیردی. قافاسیندا سورولار سیرا گئچیردی:

-" بونلار کیمیدی؟! بو نه مکتوبودو؟! نییه بونلار گتیردی؟!"

تیترر اللرله؛ تله‌سیک پاکتین آغزینی ییرتیب کاغاذی ائشیه چیخاردیب اوخوماغا باشلادی. مکتوبدا قیسسا یازیلارلا اونون خلبان ارینین وطن ‌یولوندا شهادته چاتماغینی تبریک دئمیشدیلر.
قادین کلمه‌لری دوشونمه‌ییب؛ یاهوت ایسته‎میردی دوشونوب اینانسین. بیرده اوخودو. ایکی‌ده اوخودو. گؤزلری قارالیب باشی فیرلانماغا باشلادی. قادین حیس‌ائتدی قارنیندان بیر تئل قیریلیب، ائشییه یول آچدی. ایستی سو آیاخلاریندان یئره آخیب یئری ایسلاتدی. قادین قاپیدان آیریلیب شاببیلدییلا یئره سره‌لندی.

آروادین ناله‌سینه، قونشولار پیلله‌لره قاچیب اونو او حالدا گؤررکن، بیماریستانا قاچیرتدیلار. آرواد اوشاغینی دوشورموشدو. بیر ایکی گؤندن سونرا جنازه‌کیمین ائوه دؤنمک زوروندا قالدی. آروادین حالی خارابیدی. ارینین تورپاغا تاپشیرماق تؤره‌نینده‌ حاضیر اولما‌دی. دواملی چیغیریردی:

- " یوخ! او منیم اریم دئییل. منیم اریم اؤلمز. یانی اؤله بیلمز. منیم اریم منی یالقیز بوراخیب گئده ‌بیلمز. بیلمیر منیم اوندان سونرا کیمسم یوخ؟! حتمن ایشتباه اولوب. منیم اریم یارالانیب اسیر دوشوب. منیم اریم گئری گله‌جک. هر زامان اریمین گئری گلمه‌سینی گؤزلویه‌جاغام....."

اؤزونه گلمک؛ نئچه آی سوردو. اؤزونه گلندن سونرا، هرگون آیریلان گون؛ گیردیغی پالتارلاری گئییب فردوسی میدانیندا سون آیریلان نقطه‌ده دوروب اوفوقلارا گؤز تیکدی. سانکی ایستردی، ارینین طیاره‌سینین گلمه‌سینی هامیدان تئز گؤرسون. آما بو اینتیظار ایللر ایدی سوروردو .

هاوا قارانلیغا گئدیردی. سیگار ساتان زنبوری چیراغینی ناسوسلاییب آلیشتیردی. زنبورو چیراغی خورولدویوب قارانلیغی قوودو. سیگاراچی یاواشجا قادینا یاخین‌لاشیب آجی محبتله:
-یاقوت خانیم، بو گون‌ده گلمه‌دی. دور گئت ائویزه، انشاالله صاباح گلر، دئدی.

آرواد باشینی قالدیریب، روحسوز گولومسویوب، دینمه‌دن قالخیب یولا دوشدو. سیگاراچی اونون صندلی‌سینی دالانا قویوب رادیوسونو آچدی. رادیودان بیر قادینین محزون سسی چئوره‌نی بورودو:
"...
بو شهیرده‌کی یوخسان، خیابان بوم ‎بوشدو
بو شهیرده‌کی یوخسان، گؤردویوم هرشئی؛ خیالدی‌
سن کی یوخسان؛ منی داغیلمیش گؤره‌‌‌‌سن
سن کی یوخسان؛ منی بوم بوش گؤره‌ سن‌
اللرین ایستی‌سی، یادیمدان چیخماز
حیاسیز اؤپوشون یادیمدان چیخماز
بوشهیرده‌کی یوخسان، خیابان بوم ‌بوشدی‌
بو شهیرده کی یوخسان......"

۷- - قیرمیزی گئیینن قادینین یاشایشی کؤکو گرچکدیر.

۸- فارس ماهنیچی‌سی فرشته‌نین "شهرخالی" ماهنی‌سینین، آزاد چئوریلیشی. فرشته بو ماهنی‌نی، قیرمیزی گئیینن ‌قادینین یاشاییش و دیلیندن اوخوموشدوکی زمانیندا یاساق اولونموشدو.