کولت. آذ ویدا حشمتی​ نین اوشاق ادبیاتی سیلسیله‌سین‌دن "آریجیق"آدلی شعیرینی تقدیم ائدیر:

من بالاجیق آرییام
ویز- ویز ائدیب اوچارام
بو چیچکدن او گوله
قونوب، اوچوب، قاچارام

ساری- قارا گئیمیشم
دوزوم -دوزوم یولوم وار
ایکی قیسا شاخ جیغیم
آلتی اینجه قولوم وار

آنام منه سؤز دئسه
گؤزوم اوسته دئیه‌رم
اونون یانیندا اوچوب
هرنه وئرسه یئیه‌رم

بیرده باجیم قارداشیم
اویناییب، اوخویاریق
منله یاشید یولداشیم
چلنگ لر توخویاریق

بؤیوک پته گیمیز وار
هامیمیز چالیشاریق
چوخلو عاییله آری
صولح اوچون ، یاریشاریق

اؤیره‌نمیشیک بیرلیکده
داها گؤزلدیر یاشام
آیری گزیب، دولانساق
ییغیشاریق هر آخشام

بیر ده اوشاقلار بیلین!
یاوا سانجماز هئچ آری
اگر اینجیتمه‌سز سیز
او گلمز سیزه ساری.