کولت. آذ کریم مشروطه‌چی سؤنمزین- "منسیزلمیشه‌م" آدلی شعیرینی تقدیم ائدیر:

بیر گؤورچین کیمی دنسیزلمیشه‌م

بولبوله‌م ، یازدا چمنسیزلمیشه‌م

اسکی‌دن شان‌لی ، شرف‌لی ائلیدیم

زاله‌مه قارشی آمان‌سیز سئلیدیم

زیروه‌سی چن‌لی ، دومان‌لی بئلیدیم

ایندی ، موددتدیکی ، چنسیزلمیشه‌م

من‌ده ارده‌م‌لی ار‌نلر یاشامیش

ستتارا ، بابکه تنلر یاشامیش

او قدر ائلجه بیله‌نلر یاشامیش

ایندی من ارسیز ، ارنسیزلمیشه‌م

دردیمین یوخ آدی ، اونوانی دئسه‌م

حیرته دالدیرار اینسانی ، دئسه‌م

باشقا بیر سؤزله بو معنانی دئسه‌م

اؤز دییاریم‌دا وتنسیزلمیشه‌م

درد منی یاندیریر ، اما اودو یوخ

اودور ، آغزیم‌دا حیاتین دادی یوخ

دئمیرم دردلر ایچیم‌ده آدی یوخ

دئییرم : من بئله منسیزلمیشه‌م

ائی منیم منلیگیم ، ایمدادیما یئت

بیرجه گل ، منله قوووش ، دادیما یئت

منی باس باغرینا ، فریادیما یئت

بیلمیسنکی ، نئجه سنسیزلمیشه‌م