پپسی آچماق / حکایه

ذکیه ذولفقاری

جانیم سیزه دئسین، قدیم زامانلار، سیزین چوخونوز چورگه"په- په" دئین واختلار، سیزدن هیس توز قوپمایان چاغلار، یای اولاندا، ائو خانیملاری، ایت مصیبتیله شربت دوزلدردیلر. شوشه بانکالاردا ایشکافا، رفه قویاردیلار. یا دا سرین قالسین دئیه سله‌ده سو قویوسونا ساللاییردیلار. او زامانلار خانیملار قوناقلارینی بو شربتلرله قارشیلایاردیلار.

سونرالار خارجیلر گلدیلر، ایراندا پپسی و کانادادرای کارخاناسی قویدولار. او واختلار بو ایچگیلر فانتزی و لوکس ساییلاردی و هامی‌نین ألی اونلارا یئتیشمیزدی. یالنیز وارلیلار، دؤولتلیلر آلیب سویودوجویا قویاراق پوز وئرردیلر.

بیزیم قونشوموزون بیری تازا «ارج» مارکالی بیر سویودوجو آلمیشدی. اونا گؤره ده سئوینجیندن یئره گؤیه سیغمیردی.
حیطه چیخیب سسلردی:

- اکیه‌م! کانادیایلایی یودون؟( اکرم ! کانادالاری یودون؟)
- بلی مامان.

- پپسی‌له‌یده یو، قوی یخجالا. ایندی ائوه قوناق گلجاق اونا بیر پپسی آچاق.
قوناغی عزیزله‌سینلر دئیه پپسی‌نین قاپاغینی آچیب مژمئیه قویاردیلار. بیر لیوانا دا بوز سالیب قوناغین اؤنونه آپاراردیلار. سونرا أیلشیب باشلاردیلار قوناغی تعریفله‌مه‌یه:

«آی سنین باشین شاه باشینا بنزه‌ییر؛ گؤی آچیلیب سن دوشموسن یئره؛ قاشین بئله، گؤزون بئله، ... »
اونا گؤره ، ایندی بیری بیرینی تعریفله‌ینده دئییرلر:
« پپسی آچیر.»

آللاهدان گیزلین دئییل سیزدن نه گیزلین، پپسی آچمالار ائله آداما یاپشیرها... اؤلویه حالوا یاپیشان کیمی! سرین پپسی جییرلری جانلاندیریر. هردن یاغ کیمی جانا یاتیر. اؤلویه حالوا بئله یاپیشماز واللاه! یالاندان اؤیولدویونو هئچ آنلامیر آدام . تعریفلر فرحلندیریب گؤیلره اوچوردور آدامی. دئییرم بلکه ائله گؤیده اوچانلارا پپسی آچیبلار!

نولار آبالا! قورو سؤزدو دای مالیاتی ندی؟ او پپسیلری هردن یخجالدان چیخاریب آچین لطفا ! ایتر یئره گئتمز. بیردن گوررسن طرف ده دؤنوب سنه بیرگازلی و شیرین پپسی آچدی.!