کولت. آذ ویدا حشمتینین اوشاق ادبیاتی سیلسیله‌سین‌دن "یالانچی چوبان" آدلی شعرینی تقدیم ائدیر:

گونلرین بیر گونونده
شاه عباس دوربونونده
بیر چوبانجیق واریمیش
دوران اونا یاریمیش

خوروز بانی هر سحر
دورارمیش او یوخودان
قویونلاری آغ- قارا
هره‌سی بیر توخودان

یاشیل چمنلیک‌لره
چؤللره آپاراردی
هره‌سی بیر طرفده
اونلاری اوتاراردی

بیزیم بو چوبان بالا
بیراز لوغاز بازاییمیش
اوخویاردی دوزلرده
چوخلو کئفی سازاییمیش

بیرگون داریخار چوبان
دئیر قویوم باش ، باشا
دوستلاریمی اوینادیم
هامی ایشیمدن چاشا

هارای لایار تئز گلین
چاتین منیم دادیما
قوزولاری قورد یئدی
یئتیشین فریادیما

هر کس الینده آغاج
یاردیمینا قاچارلار
گولر گؤروب چوبانی
ایشیندن باش آچارلار

یولداشلاری اینجیییب ،
قاشلارینی آسمیشلار.
نه دن اونا اینانیب ،
اونا قولاق آسمیشلار ؟

گونلرین بیر گونونده
بیزیم بو چوبان گئنه
هارایلایار،های لایار
گلین یاردیما دئیه

هامی قاچار یاردیما
یاخینلاشیب قالارلار
چوبان یالان هایلامیش
گئنه اونا قانارلار

اوشاقلار آییق اولون
یاخشی ایش دییل یالان
هر شئیین قایداسی وار
دوزلوک دور بیزه قالان

بیر گون بیر قوردون یولو
بو چیمنلیکدن دوشدو
کؤکسون شیشیردیب دئدی
چوخداندیر قارنیم بوشدو

بیر هوژم ائدر سورویه
قورخودار قویونلاری
دیشلرین قیجیردادیب
باشلایار اویونلاری

چوبان گئنه های وئرر
چاتین منیم دادیما
قوزولاری قورد یئدی
یئتیشین فریادیما

بیلیرسیز آی اوشاقلار
بو چوبانا نه اولور؟
قورد سورنو بودارلیر
گؤزلری یاشلا دولور .

ایری اوتور دوز دانیش
دئییب آتالاریمیز
یالان بره بیتیرمز
دئییب آنالاریمیز.