کولت. آذ آذربایجان یازی‌چیلار بیرلیینین گونئی آذربایجان شعبه‌سینین رهبری سایمان آروزون "من اؤلسه‌م اگر" آدلی شعرینی تقدیم ائدیر:

گونلرین بیر گونو من اؤلسه‌م اگر
جانیمی گؤتوروب گئتسم بورادان.
آیاغین آلتین‌دا تورپاغا دؤنسم،
سنه خبر وئرسم، باشقا دونیادان

جیسمی‌می گؤتوروب اکسم تورپاغا
روحومو اوچورتسام سمایا بیر گون
سجده‌یه ییخیل‌سان تورپاغا سن ده
الینی قالدیرسان دعایا بیر گون...

آلنیندان اؤپجک تورپاق دوداغیم
سنه گؤیره‌جک قیزیل گول کیمی
قبریمین اوستونه دوزمه یین اوچون
بیر نئچه نیسگیل‌لی قره‌نفیل کیمی...

گؤی‌دن توللاناجاق روحوم اووجونا
یاغیشا، قارغیشا دولاجاق الین.
آدیمی سسله‌مک ایسته‌یه‌جک‌سن،
آغزیندا یارایا دؤنه‌جک دیلین.

من کی دیلیم-دیلیم یاشادیم، آمما...
قبیرده بیر بوتؤو اینسان کیمی یم
چوخ تاییم تبریزده قال‌سا دا بئله،
آذربایجان کیمی، توران کیمی یم...

بیر آخشام منیمچون داریخسان اگر
بیر آز تورپاق گؤتور اوریینه قوی.
بیر آز ایسلان گینان یاغیشین آلت‌دا
بیرجه گون وطنی کوره یینه قوی...

چک گینن میللتین آغیر یوکونو
کوره یین، اوره یین قابارا دؤنسون.
هامییا، هر کسه وطن اول گینان،
اما اؤز ایچین‌ده وطنین اؤلسون...