کولت. آذ ایسماییل خرمینین "آختاریش" آدلی حکایه‌سینی تقدیم ائدیر

زنگین سسی گلدیکده، آیاغا دوروب قاپی‌یا ساری گئتدیم. قاپی‌نی آچدیقدا، اوچ نفر زورلا حه‌یه‌طه تپیلدیلر. آغیزیمی آچمامیش؛ بیری الینده‌کی یازیلی بیر کاغاذی گؤسته‌ره‌رک دئدی: «دادستان‌ین مجوز ایله، سیزین ائوی آختارمالی‌یق». سانکی باشیما قاینار سو تؤکولدو. ال – آیاغیم اسدی، دوداقلاریم تیتره‌مه‌یه باشلادی. گاه قیزاردیم گاه بوزاردیم. سویوق تر، جانیمی الینه آلدی. آغیزیم سؤز توتمادی. چالیش‌سامدا دوداقلارمی بیر یئره توپلایام ، آلینمادی. اونلارین اوزونه باخا – باخا، چاشیب قالمیشدیم. اعتراض‌سیز، اؤلوم حؤکمونو آلان آدام کیمی بوتونلوکله اؤزومدن گئتمیشدیم. سانکی سونوم گلیب چاتمیشدی. الیمدن نه گله بیلردی کی؟ یادیما، ایگیرمی - نئچه ایل اؤنجه بیر خاطره دوشدو. داغ کندلرینین بیرینه تانیشلارین توی مراسیمینه چاغیریلمیشدیق.

گئجه یاریسی اولاردی. قاوالچی، قاوال چالیردی وآشیق الینده ساز اوخویوردو. آخشامدان، اصلی کرم ناغیلینی، سؤیله‌ییردی. بیردن، مأمورلار گلدی دییه، های دوشدو. توی مجلیسی بیر – بیرینه دئیدی. آشیق باجادان قاچماق ایسته‌ینده، مأمورلارین بیرینه توش گلدی. بیرینجی اونو یاخالادیلار. سونرا ایچری کئچیب، قاوالچینی توتدولار. هره‌سینه بیر – ایکی شیلله چه‌که‌رک، اوتانمیرسیز بیلمیرسیز کی؛ موسیقی حرامدی دئین‌دن سونرا سازی آشیغین باشینا ویریب سیندیردیلار. قاوالچی‌نین‌دا باشینا قاوالی کئچیرتدیلر. او گوندن آشیق، آشیقلیغینی بوراخیب، قایین آتاسینین کؤهنه پیکانی ایله کندلر آراسی کرایه – کئشلیک ائدیردی. قاوالچی ایسه، عایله‌سینی پینه‌چیلیکله دولاندیریردی.

ایگیرمی – نئچه ایل سونرا، بوگون منیم باشیمدا گؤره‌سن نه‌یی ویریب سیندیراجاقلار! دییه، اؤز – اؤزومه سایاقلاییردیم. او ایشلرین هئچ بیری الیمدن گلمه‌ییردی. من باشیما هانسی داشی سالاجاغیمی بیلمیردیم. مأمورلارین بیری منی ایته‌له‌ییب، مندن قاباق ائوه گیردی. ائوده‌کیلری اویارماغا، واخت تاپمادیم. هامی،‌ ائو پالتاریندا باش - گؤزو آچیق اوتورموشدولار. مأمورلار ایچه‌ری گیردیکده، آرواد اوشاق چیغیراراق، هره‌سی بیر یئره قاشدیلار. اللرینه گلنله، باش گؤزلرین اؤرتدولر. بیرآز اؤزومه گلدیم. اوشاقلارا دئدیم: «قورخمایین، بونلار مأموردولار. دادستاندان مجوزلری وار. ائوی آختاراجاقلار». کؤرپه قیزیم بودورویه – بودورویه، قاچیب قوجاغیمدا اؤزون گیزلتدی. بوینون قوجاقلاییب، قورخما بیر زاد اولماز، من بوردایام دییه، توختاتدیم.
دریندن نفس آلدیم. اؤز – اؤزومه دییه‌رک، بونلار نه آختاریرلار، مأمورلارا اوز توتدوم: «قارداش نه آختاریرسیز؟ دئیین منده سیزه یاردیمچی اولوم.» بیری دئدی: «قارداش! سنله بیز هاچان قارداش الدوق؟ مگر دده‌میز بیردی؟ بیرده دور یئرینده، قاریشما.» جانیما داها آرتیق هووشنه دوشدو. ائویمده دوستاقلانمیشدیم. آغیزیمی آچیب بیر سؤز دئمه‌یه اختیاریم یوخ ایدی. بیری‌سی کتاب‌لاری تؤکوب داغیدیردی. بیر – نئچه‌سینین اوستونو اوخویاندان سونرا دئدی: « سن نه کؤهنه بئیین آدامسان؟ چوخوف، داستایووسکی، گورگی، نرودا، پتوفی، برشت و . . .! بولارین سوموگلری‌ده چوخدان چورویوب. سن هله ده بونلاری ساخلاییرسان!» بیر سؤز دئمه دیم. کتابلاری دویونجان تؤک – داغیت ائده‌رک، باشقاسینا بوردا، درده دئین بیر زاد یوخدورکیمی سؤزلر دئدی.

یاتاق اوتاغیندا، خانیمین بزه‌ک – بوزه‌کلریندن توتدو، آلت پالتارلارینا دک، آراق – واراق ائله‌دیلر. آختاردیقلارینی تاپماییب، دامین اوستونه چیخماق ایسته‌دیلر. دامین چیخیش قاپیسینین یانیندا بالاجا بیر قابدا، یئدی- سئککیز کیلو قارا اوزوم قویموشدوم. بایرام واختلاریندا دوست – تانیش گلنده الیمی اوراغا وئرمه‌ییم دییه، ساخلامیشدیم. بیری آیاغی ایله، قابا ویریب، سوروشدو: « بو ندی؟» اؤزومو لاپ ایتیردیم. آغیزیمی آچمادان، باشقاسی منیم یئریمه جواب وئردی: « نه اولاجاق! حتما شراب قویوب.» چالیشدیم اونلارا دئییم کی یوخ والله! شراب دئییل؛ سرکه‌دیر، آلینمادی. بیری آجی - آجی گولومسه‌یه‌رک دئدی: « کیشی سرکه‌نین لیتری ایکی مین تومندی. باققال‌لاردا ایته تؤکدودور. ایندی ائله ائولرین هامیسیندا بوندان وار. مهم دئییل. بیز باشقا زادلار آختاریریق.»

دامین اوستونه چیخدیقدا، بیرینین گؤزو، ماهواره‌یه ساتاشدی. منه ترسه- ترسه باخیب؛ هات بیرددا بترآچیق فیلیم‌لر وئریر سؤیله‌دیکده، اوزومو تورشودوب، منیم ساچیمدان- ساققالیمدان سووشوب کیمی سؤزلر دئدیم. باشقاسی منی دولایاراق؛ ائوده، شطرنج‌دن - ویدیودان زاددان یوخوندو، دئین‌ده اوچوده گولوشدولر.

ائوی الک – قلبیر ائدیب، بوتون دلیک - دئشیکلره باخدیلار. بیری تئل‌سیزی الینه آلیب، نم کیمه دئدی: « بیر زاد تاپمادیق قوربان. گلیریک.»