کولت. آز آذربایجان شاعری خلیل رضا اولوتورکون وفاتی گونو موناسیبتیله اونون شئیرینی تقدیم ائدیر:

بو دونیادا اوتون، سویون، تورپاغین دا یادداشی وار.

سیندیریلمیش بیر بوداغین،

سؤندورولموش اوجاغین دا یادداشی وار.

الک-ولک، دارماداغین اوتاغین دا یادداشی وار.

بایاق ایستی، ایندی بومبوز یاتاغین دا یادداشی وار.

نال‌لی چکمه آلتین‌داجا قولو چیخان کوکلاجیغین،

میز اوستون‌ده یئتیم قالان بیر قله‌مین،

واراغین دا یادداشی وار.

آذربایجان تانیمیش‌دیر واخت‌سیز قاپی دؤیه‌نلری،

قارا گونلر گتیررکه‌ن قان قیرمیزی گئیه‌نلری.

یوخ، اونودا بیلمریک بیز خئییر جیل‌دی گئیه‌ن شرعی،

یوز مینلری… قانون‌سوز و محکمه‌سیز

گوللباران ائد‌نلری.

قورخا- قورخا یاریم آددیم آتا-آتا،

آیاق اوسته یاتا-یاتا،

قورشاغاجان قان‌لی قارا باتا-باتا

سورگونلره گئدنلری.

آج، یوخوسوز، نالان، اوریان

مین-مین قوجا، مین-مین جاوان

ایش اوستون‌ده بیر سوموک‌دو، بیر ده دری

یوخ اونودا بیلمریک بیز

آج جاناوار ایشتاهییلا یوردو سؤکوب تؤکه‌نلری،

بیر دسته‌نی قانا چکه‌ن دستباشی تکه‌لری.

رهبر، خادیم ساییلاردی

باش کسه‌نلر، گؤز اووانلار

حاق باغیران بوغزلارا قوشون تؤک‌دو

مارکاریانلار، قریقوریانلار.

یان‌دا دوردو توپوریدزئ، آستا جللاد، اوستا جللاد.

آدی دوغما، اوریی یاد.

میر جعفرین اللریله ویران قال‌دی خانیمانلار.