من یاتاغین ایکینجی مرتبه‌سینده یاتانمارام. یئریمی ده‌ییشین.

«من یاتاغین ایکینجی مرتبه‌سینده یاتانمارام. یئریمی ده‌ییشین.»

در حال دئدیییم سؤزه پئشمان اولدوم. ایچیمده‌کی قادین منه گؤز آغارتدی. یئرینه ایشه‌ییب، شیرین چای ایسته‌ین بیر اوشاق کیمی حیس ائتدیم اؤزومو.

دوشرگه‌نین گؤزتچیسی‌ ایله بیرلیکده منی اوتاغا گتیریب یئریمی گؤسترن دیلمانج دئدی: «ایکینجی قاتدا یاتانماسان اتاغیوی دییشدیره بیلرم آمما من سنین یئرینه اولسایدیم تگلر زنین پرسپکتیوینی ألدن وئرمزدیم. دنیزین پرسپکتیوی یاتاغین ایکینجی مرتبه‌سیندن داها دا گؤزل و آیدین گؤرونور.»

«تگلر ز هارادی؟»

«بیلمیرسن هارادی؟ تگلر دنیزی دا.»

دنیز پنجره‌نین چرچیوه‌سیندن رسم اولونموش بیر تابلو کیمی گؤرونور. رنگارنگ یئلکن‌لی قاییق‌لار دا دنیز سویو کیمی ساکین دیرلر. دنیزه، شلاله‌یه، چایا آچیلان پنجره‌ دونیانین أن جاذیبه‌لی پنجره‌سیدیر. هاندا قالسین بو جاذیبه‌لی پنجره بئش‌مین کیلومتر اؤلکه‌مدن اوزاق بیر دوشرگه‌نین پنجره‌سی اولسون. ذهنیمده‌کی دوشرگه فیلم‌لرده گؤردویوم دوشرگه‌لره تای، زندان کیمی بیر یئر ایدی. اونا گؤره دیلمانج منه سئچیم حاقی وئرنده تعجب ائله‌سم ده اونون تووصیه‌سی عاغلیما باتدی. دیلمانج آرتیردی: «اتاقدا اوز وئرن هر هانسی بیر ناسازلیغی سالونون آخیرنداکی سکوریتی اتاغینا خبر وئرمه‌لیسیز.»

سورمه‌ای کت شالوار گئیمیش ساری ساچلی سکوریتی‌نین بدنی گولشچی کیشی‌لرین‌ بدنی کیمدیر. دیلمانج دانیشیرکن او ایسه دونوق باخیشییلا دیک دیک اوزمه زیلله‌نیب. دییه‌سن گؤزلریمین آلتینداکی قیریشلاری أزبرله‌ییب، کیپریکلریمی ساییر.

بئله کی گؤرونور بوندان بئله دنیز یئرینه ز، گؤزتچی یئرینه سکوریتی، منظره یئرینه پرسپکتیو دئمه‌لییم. ز هارا دنیز هارا؟ آنلاملاری بیر اولسا دا ز سؤزو هر هانسی بیر دنیزین لپه‌له‌نن سویونو یادیما سالمیر، یالنیز دیلیمین اوجوندان هاوایا بوراخیلان بیر سس کیمی‌دیر. سکوریتی سؤزو ایسه سکوریت شیشه‌لری یادیما سالیر. آمما منه دیک دیک باخان سکوریتی خانیم ایسه شیشه‌‌ دئییل، داش کیمی سرت و سویوق بیر وارلیغا بنزه‌ییر...

*دوشرگه: اردوگاه

«دوشرگه آدلی رمانیمدان کیچیک بیر پارچا»