کولت. آذ ائلتاش صالیحینین " وزونه تامارزی " شعیرینی تقدیم ائدیر:

پاریلداییر شهرین ایشیق‌لاریندا

اوتاغیمین قارانلیغی

تیر چکیر خییاواندا ایشیق‌لار

تیر چکیر قلمیم

تیتره‌دیر پرده‌لری سؤزلریم

و تیتره‌ییر پرده‌لرین…

قانایان آنیلاریمدا

پنجره‌لر قلب قیریزینه کئچه‌سی‌دی،

سنسیزلیگیمین احتیرامینا

سؤنور شهرین پنجره‌لری بیر به بیر؛

بوتون قاپی‌لار سنی آسقیریر

سویوغون ده‌یمیش خییاوان‌لارا!!

قیش بورویوب شعرلریم

هر سؤزجوک سنی فیسیلدادیر

کاغیذلارین قارلی گؤزلمینه

هله‌ده…

قاپی دالیندا آسقیلانیب عطرین

هله‌ده باشماقلیغیم یئریکدی باشماق‌لارینا؛

دووارلاردان آسیلیب بارماق‌لاریم

دووارلار آسیلیب بارماغیما

اوزونه تامارزیدی اللریم

تام آرزیدی اللرین!!

قیزیشیر شعرلریم

لیمانچی‌لارین اود چللگینده،

قولاغینا دئییرم شعریمین

»انا خلقناکم من الگؤزلری…»

مین سطیر باخیش یازیلیر گؤزلریمه

یاغیر اووجونا دوداق‌لاریم

اوپدوگوم هر سیقارین،

سیقار پاکئت‌لریندن آلیرام دوداغینین تام‌ین

یاغیر آیاق ایزلرینه دوداق‌لاریم

یا قیر آیاق ایزلرینله دوداقلاریمی

اؤپوش فیلتئرلری دولدوروب شهری

شهرین سوفراسیندا کیفسه‌نیب سئرچه‌لرین اؤتوشمه‌گی،

یولجولاردان اؤنجه

گؤز یاشلاری مینیر آوتوبوس‌لارا

تله‌سیک سولانیر سنسیزلیگین چؤره‌یی

باخیرام قول ساهاتیما

بیر ساهات سنسیزلیگیمه آرتیلیب…