کولت. آذ گونئی‌لی یازار نریمان ناظیمین "ایکی یول وار" آدلی حکایه‌سینی تقدیم ائدیر:

لامپا ایشیغی‌نین قفیل ساچیلیشیندان کیشی‌نین گؤزلری قاماشدی. اوغلان، «بس نییه چیراغی یاندیرمیرسان؟»- دئیه، الینده‌کی کیفی موبلین اوستونه قویدو. کیشی، میزه دیرسکلنمیش اللرینی گیژگاهیندان گؤتوروب گؤزونون اوستونه قویدو. «یانا، یانمییا فرق ائله‌مز، گؤزلریم دای سئچمیر»- دئیه گؤزلرین اوووشدوردو. سونرا کیتابی بوکوب، سیگار آلیشدیردی:

اوغلان تئلویزیونو آچدی؛ گئدیب ایکی ایستکان چای سوزوب گتیردی.

آخشام‌چاغی‌نین سرینینده نه اوچون قدم وورماغا گئتمیرسن؟

کیشی بیر سؤز دئمه‌دن سیگارین چکیردی.

دئییرم آی آتا! بیر عؤمور چکیش- برکیش، اوخویوب یازماغی‌نین نتیجه‌سی نه اولدو؟

او کی گره‌ک اولئیمیش اولدو بالا!

یانی بویورورسان آلین یازیسی‌ایمیش؟

یوخ، آلین یازیسی دئییل، چیخاریمیز بو‌ایمیش.

کیشی کؤکسون اؤتوردو. نئچه لحظه‌دن سونرا دئدی:

من بو نئچه ایلده بونو باشا دوشموشم.

بس ایندی نئجه اولاجاق؛ ایندی کی اولدوغوموزدان اولموشوق؟

ایکی یول وار اوغول! یا گره‌ک بیز جاوانلاشاق، یاداکی جاوانلاریمیز قوجالاشالار…

تئلویزیوندان یاییلان سس بیر آن‌دا باغیرتی‌یا چئوریلدی: «گل ..گل… گل…….» اوغلان یئریندن سیچرادی. دلیجه‌سینه آتیلیب دوشه‌رک، سسینی تئلویزیوندان داشلانان آلقیش سسلرینه قاتدی. «مساوی… مساوی …، مساوی.»

***

کیشی تئلویزیون قاباغیندا دیرسکله‌نن اوغلانی سسله‌دی:

چای بوزا دؤندو، دور گل چاییوی ایچ!

اوغلان: «ایچمیرم، بوشلا!»- دئییب، سونرا سوروشدو:

آتا سن دئییرسن بیز اوتاریق، یا اوتوزاریق؟

کیشی بیر داها کؤکسون اؤتوردو. توتغون سسله:

بئله گئتسه اوتوزاریق اوغول! اوتوزاریق، – دئدی.